Takebbanit n tmurt n Fṛansa « Danone » n yisufar n uyefki, d uyefki, d twurac akk i d yettak uneggaru-agi, tssarem ad tssefti tadrimt-is, deg yiwen n usenfaṛ imetti, di tmurt n Lezzayer. Asenfaṛ-a uwmi semman « Sahazine », yella ddaw n leɛnaya n yitri ameḍlan n ddabex uḍar, wagi d amyurar n zik Zinédine Zidane, i yellan daɣen d yiwen i ixeddmen adellel i tkebbanit-a. Dacu kan adabu (gouvernement) n Lezzayer, ur iwala ara s tiṭ yelhan tikti-agi, imi i d-yenna, isenfaṛen am wigi ttwexdamen deg tmura yenḥafen, ideg llan yemlluẓa. Maca ɣer tkebbanit « Danone », annect-a d tikerkas, acku nnan seg tama-nsen: « asenfaṛ « Sahazine » iswi-ines d imetti, ttekkin deg-s aṭas n yimdanen n at lxiṛ, i iqeddcen ilmend n wannect-a, i wazal ma drus aseggas-aya, ma d takebbanit « Danone Djurdjura Algérie », s ttnefxa i d-tmud afus n tallelt, deg usenfaṛ am wagi, iwmi nessaram talalit deg useggas n 2012 ». I usmekti asenfaṛ-agi, yewwi-d di ṭṭeyyat-is asufeɣ n yifuras (produits) n uyefki, i yesɛan asafar n lkalsiyum (calcium) s ṭṭaqa, i yettmuddun ṣṣeht (énergie) i warrac s tuzert n yiɣsan, ma d aznuzu n yifuras-agi ad yili s ssuma ṛxisen maḍi, iwakken ad ṣuḥen i warrac akk, ladɣa wid n twaculin yenḥafen. I ubeddu n usenfaṛ, ad yili yiwen n usarag deg wagur n Magu i d-iteddun di tmanaɣt, s lmendad n uselway anemhal amatu (PDG) n « Danone » Franck Riboud akked Zinédine Zidane, dacu kan ɣef leḥsab n yisallen ineggura, adabu yeṭṭef deg awal-is, ma d takebbanit urǧin teqḍeɛ assirem.
Farid Lahouari