Ad tefru temsalt n Wudayen d Falisṭin, ur tferru temsalt n tmaziγt deg uγerbaz. Amek wwḍen yimaswaḍen n taεrabt ad asen-inin i yiselmaden-nsen ad xtiren swayeε i ten-iεeğğben u ad ğğen tamaziγt ma yeggra-d lweqt ? Akka ula d inemhalen, qqaren-d i yiselmaden n tmaziγt :’’tamaziγt ad tt-neğğ d taneggarut, ad nezwir s tid yesεan azal…aha tura fhem-itt kečč, ‘’aεidiw n baba u jeddi, rniγ rekkba γer deffir.’’ Meεna ccah deg-neγ akken i d-yenna yiwen uselmed :’’d nekni i yebran i ṭṭbel deg waman wamag ur nettaweḍ ara γer liḥala am ta. Lukan mazal nettεeggiḍ am zik tili tamsalt ha-tt-ah tefra.’’ Aseggas-agi dγa terwi tebberwi. Llan yiselmaden i yesγaren di 4 n yiγerbazen. Yiwen n tselmadt tesγar kan si ttnac ar lweḥda d uzgen. Tayeḍ, tesγar ass n ttlata tameddit weḥd-s di lakul. Tayeḍ txeddem kan azgen n lweqt. Aṭas n tselmadtin i iteddun d baba-tsent axaṭer yessewḥac ubrid uḍar mi ara ruḥent seg uγerbaz γer wayeḍ. Yiwet tesγar di Tsadurt (35 ikilumitren deg umalu n Tizi Wezzu) tettkemmil di Tala Σetman (18 ikilumitren deg usamar n Tizi Wezzu), aya yeffeγ i lqanun. Di tmezgida, d anemhal s timmad-is i yugin ad γren tamaziγt. Yenna-asen :’’kerheγ tamaziγt, ur tt-qqaren ara di lakul-iw.’’ Yerna d aqbayli zaεma. Tayeḍ tenna-aγ-d :’’nekk sγareγ di 3 yiγerbazen. Imi yettxaṣṣa ttawil usiweḍ, sani i d-iεedda ufurgu ad d-dduγ ad sseγeγ din.’’ Wiyaḍ sdukulen inelmaden n uswir wis4 d wid n uswir wis5 ad ten-sseγren akken akk. ‘’Aḥkim ur nesεi ara aḥkim, anwa ara yugad ma yeqqim.’’ Akka yerna la d-qqaren kullec igerrez. Aya, mebla ma nudder-d uguren-nniḍen, am wugur, dγa, n uhetwir-nni yekkren gar wid i d-yettheggin idlisen n tmaziγt. Aṭas n yiselmaden i yesteqqsayen amek i d-yettili ufran n yimdanen-agi i ttawin ttheggayen-d idlisen ? ‘’Limer i ak-terbiḥ ay ul, ilaq d iselmaden i teεna temsalt d imezwura, syin d imaswaḍen.’’ Akka i aγ-d-yenna H.M.
Akken yebγu yili, asirem meqqer γer yiselmaden, lebγi yella gar-asen, Tamaziγt « est une conscience, elle ne dort jamais » Ihi,ili-k d argaz a lγiḍa !!!
Hocine. M