Aggur n tuber d win ur nettɛeddi ara kan akka mebla ma yemmekta-d ugdud azzayri kra n yineḍuyen yerzan amezruy-is. Ama di lawan n ṭṭrad deg useggas n 1961 neɣ ahat di 1988, Izzayriyen bedden mgal liḥala ideg ttidiren. Tadyant n 88 tettuneḥsab d tallit yuran s yisekkilen n wureɣ, imi akken nebɣu nini tura, deg-s i d-isuḍ ubeḥri n tlelli. Deg-s daɣ i yexreb uzeṭṭa n ukabar awḥid yesberbren ɣef ugdud almi yekfa wawal, yekfa umbiwel. Irgazen, tulawin d yilmeẓyen n tallit-nni rẓan leqyud n tsusmi, suɣen “Basta !», fɣen ɣer yiberdan. Mebla akukru, d lfuci i ten-id-iqublen: txus kan la Seine ! Ass-a, mi ara d-nesmekti amulli wis 23 n tedyanin-a, ad nezzi udem ɣer win yettwafetken s 5 n terṣaṣin deg ubrid n Micli. yak yenna:
A taḥeccaḍt n ubrid
Ɛiwen-iyi deg yimeṭṭi
Ɣef uǧadarmi-nni N Micli
Iyi-gezren ɣliɣ
D Lwennas iwumi nessawaḍ rreḥma ass-a, i yeddem zhir n la kalachnikov mi akken yessawal ɣer talwit. yak ass-nni, yewwi yid-s kra n tewriqin anda i d-grin tiɣri i yiqbayliyen ur skarayen ara cwal. s wul qessiḥen, mmarent deg-s terṣaṣin. rrant-t d lǧessa yexnunsen deg yidem. Ulac win yumnen ad yidir, imi tiyita qessiḥet. Ussan neɣ ahat agguren yesɛedda di sbiṭar n Lezzayer tamaneɣt beggnen-as-d acḥal i tettɛuzzun leqbayel, imi ur yeshil ubrid ɣur-s, yal ass d imeyyaten n yimdanen i irezzun ɣur-s, ttrebbin-as afud. D tamurt n fransa iɣer yunag iwakken ad inadi ɣef yimejjayin ara iqeɛden tazmert-is d lqedd-is. Lwennas d amedya seg wid i teqqes taluft n tuber. Maca, limer ad nezzi tiṭ ɣer wiyaḍ, ad naf mačči drus n taswin i yettwajerḥen. Tawacult n Ouchellouche di lezzayer tamenaɣt ad d-teched ass-a amek i tedder liḥala-nni, d mmi-s yettwaqecɛen ur yessaweḍ 20 n yiseggasen di lɛemr-is. Ur yili d imciṭen, ddnub-is kan imi d-yeffeɣ ad yessuter ad yedder di tilelli, ad yesɛu izerfan-is. Tiddukla n twaculin meḍruren n tuber neɣ (A.V.O), mazal-itt, tezmer ad d-tefk chada n wayen yeḍran d wacḥal n twaculin yennuɣnan.
Lawan-a, mi yekker yiwen ad ak-yini acu-ten yikabaren-a, acu-ten yiɣmisen-a. Maca iwulem ad imuqel cwiṭ ɣer deffir ad iẓer dakken aya ur d-yusi ara d asefk. D idammen yuzlen, d lḥif n wid yettwaṭṭfen i d-yessawḍen tilelli n wass-a akken tebɣu tili txuṣ. Wigi ssuturen-d deg-neɣ ḥala cfawat !
Sylia. M