Taddart n Ssebxa d yiwet n taddart taqburt di tɣiwant n Aḥnif, ǧǧan-tt imezdaɣ-is snat tikkal , tamezwarut di tegrawla n 1954, mi tefra uɣalen ɣur-s, alarmi d iseggasen n 90 di tegnit-nni taberkant i d-yeɣlin ɣef tmurt aladɣa tamurt n Leqbayel. Taddart-agi tettwabna ɣef yiwet n tiɣilt iwumi zzint tɣaltin yesɛan azal n 500 m di leɛli (tiddi),tebɛed ɣef tɣiwant-is s 18Km, ma yella ɣef Lwilaya n Tubiret s 50Km. Ssebxa tesɛa tajuma n 02km2 ,dayen i d-tt-yeǧǧan ur tesɛi ara aṭas n iɣeggedan , ala ayen yeṭef uzemmur d umadaɣ (tiẓgi). Isem-agi n Ssebxa ɣef akken i d ḥkun,d Irumiyen i-as-tyefkan di tegrawla n Ccix Lmeqrani di tmurt leqbayel deg useggas n 1845. ɣef akken id ḥekkun imɣaren n taddart-a,tella yiwet n tmenna ɣef tifin n tmellaḥt n Ssebxa;d akken adrum Izenkaḍen di taddart n Weẓru Uɣilas sɛan ɣur-sen aklan sexdamen-ten,ama di tfellaḥt neɣ i tkessawt… Akli-agi yufan tasift n waman n lqares d ameksa ɣer yiwet n twacult n Izenkaḍen;mi id yessuɣel (yuɣal-d) ɣer wexxam yeḥka-as i bab-is ɣef wayen Yufa, bab-is ur t-yumin ara,azekka-nni yedda yid-s ɣer din,yufa ayen i-as-d yenna wakli-nni d ṣṣaḥ,iɛedda ijemɛed cwiṭ n lmelḥ(tisent)iqquren ɣef yiri n tasift yewwi-t-id yid-s akken ad amnen at taddart… Ferḥen at taddart s-ugerruj i yufan, lumeɛna aɣbel-nsen d akli-nni,lamer ad yessaweḍ ɣef ayen yufa i wat taddart-is,nejmaɛen at taddart akken ad d-afen tifrat i weɣbel-agi. refden sersen deg uɣbel-agi fɣen-d s yiwet n tifrat,ala timenɣiwt ara ten-iselken. ihi akka id teḍra nɣan ameksa-nni…,syen akkin guǧǧen ɣer taddart n Ssebxa.
Ziar Ahcene