Win yekkren γer wayeḍ ad as-yini :’’win yeγran yeγra zik-nni, tura lakul yekfa’’. ‘’Xas ulamma ciṭ yella, ciṭ yerna, meεna amur ameqqran n lecyax xeddmen seg wul-nsen ; ttaken-d tazmert-nsen ; ayen snen. Ugur itekk-d, ahat, seg wayen-nniḍen’’ akka i aγ-d-tenna M.D. Ayen yeḍran deg uγerbaz Mimoun n temdint n Tizi Wezzu yettbeggin-d nniya i mazal γer lecyax. Yiwet n tselmadt n uγerbaz-a terreẓ deg ufus azelmaḍ ; terreẓ di sin umekwan. Yefka-as-d ṭṭbib 45 n wussan n usteεfu. Acu kan nettat tusa-d ad texdem. Neεreḍ ad nẓer acimi ur teqqim ara deg uxxam alamma teḥla, tenna-d :’’ur yefki ara wul-iw ad ğğeγ inelmaden-iw 45 n wussan. Ur ttsillikeγ ara ahil yerna nutni ha-ten-in deg useggas amezwaru, d aseggas-agi i d lsas di leqraya-nsen. Rnu γef wanect-a, inelmaden wulfen-iyi, lukan ad qqimeγ 45 n wussan ad asen-d-awin taselmadt-nniḍen, yezmer ad tuqelqen yid-s’’.
Mi ara tesleḍ i yixemmimen-a, yezmer bnadem ad d-yini mazal lxir γer sdat. Inelmaden n tselmadt-a ad cfun i lebda i lxir i d asen-texdem tcixet-nsen imi i asen-tbeggen lakul mačči kan d leqraya di tektabt, neγ d tira di tewriqt ; leqraya d ttrebga, d amεiwen, d lefεayel ara d-tteḥfiḍen inelmaden di sira n ccix-nsen. Akken i as-yenna winna :’’win ur nezmir i lxir, yerr areṭṭal !!!’’
Hocine. M