Yuγal Muḥend yenṭeq γer γur-s : Qesmeγ-kem-id s Ṛebbi ma ur yi-d-tenniḍ anta kemm a lexliqa-agi ?
Faṭima : Nekk d ṛṛuḥ-ik, d nekk i ijerrden isem-ik, bγiγ ad ak-awiγ yid-i akken ad yennerni wazal-ik.
Muḥend : Ini-yi-d ansi-kem d wanida ara yi-tawiḍ ?
Faṭima :
Nekk usiγ-d seg usammar
I yellan d annar
Deg mlalent tγermiwin
Ṛebbi d imdanen-is i yextaṛ
D ameẓyan, meqqeṛ
S wawal-is i yettγennin
Tamurt-iw s tmusni teεmeṛ
Uḥdiq γur-s ihajeṛ
Yelmed tasekla d tesreḍin
Mi as-yesla akka, yekker ula d netta yerra-yas s usefru :
Nekk ma mačči s tin-inu
Aγanim ur ileḥḥu
Ayen uriγ imeḥḥu
Ttuγaleγ mačči d amyaru
Limer tesneḍ a yexti
Iḍ-a lembat-im γur-i
Tahuski-m tseḥḥer-iyi
Ttxil-m ddu-yi di lebγi.
Faṭima telwawec mi as-d-yenna akka, Dasin terfa ketṛayen ladγa imi twala Muḥend yeεǧeb-as zzin n Faṭima, tugad ad teqbel ad tnes γur-s, ladγa d tin akk i d tawaγit ! Tuγal tecmummeḥ-d akken ad teṛbu lγecc i d-yulin γef wudem-is, maca yettban γef tiṭawin-ines tuḥṛicin dakken yella wayen i wumi tesseγwas ad t-texdem. Taswiεt akka tenṭeq γur-s :
* D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010