Seg ass n 01 ar 02 deg agur n tubeṛ yezrin, tessudes-d tenmehla n yidles n lwilaya n Tizi Wezzu d tdukla tadelsant Si Muḥ Umḥend s lemεawna akked tdukla tadelsnat tussnant n Xencla (ACSK) ussan n tγuṛi γef tgellidt tamaziγt Yemma Dihiya. Leqdic-a adelsan yemmugen deg uxxam n yidles Lmulud at Mεemmeṛ, llan-d deg-s waṭas n yisaragen ideg d-wwin awal waṭas n yisdawiyen i d-yusan seg tesdawiyin yemxalafen n tmurt, γef umezruy n tgellidt Dihiya d yimennuγen i texdem ilmend n lḥeṛma d leqdeṛ n tmurt-nneγ. Am akken daγen i d-tella temzikent ideg d-tefser tdukla ACSK tiγawsiwin tansayin n temnaḍt n Wawras am tẓeṛbiyin d yisγunen, rnu γur-s afsar n yidlisen d yimagraden n tγamsa yesεan assaγ akked yidles amaziγ i yes-sen tzeddi tdukla n Yisseγ n Ṣwameε n lwilaya n Tizi Wezzu. Aγmis n Yimaziγen yeḥḍeṛ i tmeγṛa n taggara n sin-a n wussan n tγuṛi (tezrawin), tameγṛa tella-d deg tzeqqa n yisaragen n uxxam n yidles Lmulud at Mεemmeṛ anda i tesseḥma taqaεet terbaεt n ccna « Itran n Dda Lmulud » s ẓẓuṛna d dderbuka akked cḍeḥ s sda n tcawit ; syin akkin yefka-d awal mass Weld Σli Lhadi anemhal n yidles n Tizi Wezzu, awal ideg yesnemmer wid akk i d-yefkan afus n tallelt di leqdic-a ladγa inebgawen i d-yusan seg Xencla γef uqeṛṛu-nsen mass Ǧellal Ṭeyyeb s yisem-is d aselway n tdukla ACSK daγen netta d ameγnas ameqṛan n tmaziγt deg temnaḍt n Yicawiyen. Mass Ǧellal Ṭeyyeb seg tama-s mi t-id-iṣaḥ wawal, yesnemmer aṭas tanmehla n yidles n Tizi Wezzu ladγa mass Weld Σli Lhadi ilmend n wayen i ixeddem deg wayen yerzan asnerni n yidles amaziγ d yidles azzayri s umata. Tameγra tekfa s tukci n warazen i wid meṛṛa yettekkan deg leqdic.
Mokrane Chikhi