Deg tuffirt n yixef n yal amdan, tasusmi tecba ulac, tecba nger, tecba lxali. Amdan, anda ma yella yettkukru-tt, acku agama i d as-d-yezzin d lmenṭeq.
Deg wannect-a ad naf amdan, di yal aɣref, iḥemmel ad yezdew ɣef ṣda n waman yeskikiḍen iwedcen deg tregwa , isenned ɣef zhir n lemwaji yemdarkalen ɣef yicerfan deg yilel. Iḥemmel ad yeččar ilem n tudert s ccna n yifrax akked ṣṣut n yiɣerṣiwen di tẓegwa. Xas ulamma d yiman-is, amdan yettmeslay akked yixef-is akken ad yergel rreḥba n tsusmi ulamma s tmenna n yiman i yiman. Askasi yezga gar-as akked kra i d as-d-yezzin !
Aya iwert-it umdan asmi i t-yuɣ lḥal di tɛebbuṭ n tyemmat imi, azal n 9 wagguren yettwennis s ṣṣut n wul i ihebbken akken ad yecnu ccna n tudert ! Seg yimir, amdan yefka anamek i tudert, iga-as tansa : d awal , d timenna, d ccna, d timucuha, d tanfusin. Yezri wakud tuɣal d tasekla s wudmawen-is meṛṛa ama d ungalen ama d amezgun !
Akken ad yeɣḍel tasusmi, amdan iga inaditen yesnulfa-d allalen ara d -yerren ṣda n tudert ɣer yixef-is am uqaṣab, tajewwaqt, amendayer, ṭṭbel, igambaren. Yedda zzman armi yeṣṣawed umdan yerra lmenṭeq n kra yellan d allal gar yifassen-is. Radyu d yiwen n uḥric yessegrawlen tuqna n tmenna ɣer lebɣi-s.
S lmendad n ttawil-agi yeɣḍel umdan tasusmi deg tudert-is , imi ass-a, anda ma yella rradyu tezga ɣer yidisan–is. Deg uxxam neɣ di beṛṛa , deg yinig-ines neɣ di lexla yezga umaṭṭaf ɣer yidisan is. Yezga d arfiq yessifsusen fell-as tiɛekmin n tudert, yezzuzunen ɣef yixf- is lwaḥc n tsusmi.
Tiyemmatin-nneɣ, deg uxxam, ḥemlent ad slent i rradyu mi ara d- lhunt d leqdic-nsent. Deg umecwar, imsenharen ssiwzilen teɣzi n ubrid s usmehṣas i tedwilin i d- ttawint lemwaji n umaṭṭaf alamma d ɣur-s. Ass-a, yal yiwen deg-nneɣ, iga lmendad i wazal n rradyu di tudert n yal-ass.
Maca rradyu ur telli ara kan d ttawil n lemwansa imi, deg yirebbi-s tasertit , tusna d yidles ufan annar deg ara ftin. Ɣef waya, rradyu, tikwal yettili d leslaḥ gar yifassen n wid i t-yessexdamen akken ad zerɛen tikta-nsen di temeti.
Nnig n waya, rradyu d rreḥba deg yidelsan imawiyen ufan leqrar am yidles n teqbaylit. S ttawil-agi i yemɣi ccna n Sliman Azem, ccix Lḥsnawi, Zerruq Ɛellawa, Crif Xeddam, Akli yeḥyaten, Lunis Ait Menguellet… gar yimdanen. Am wakken diɣ s ttawil n rradyu i d-yennulfa umezgun s teqbaylit.
Ihi, rradyu am yesekkin, di snat n lejwayeh-is yeqḍeɛ. Am wakken i d -as teddiḍ ad ak-teddu. Awal i t- ferrun d awal.. akken tella rradyu iwumi smeḥsisen yimdanen i yella wudem n tmeti ideg ttidiren. Nezmer ad neseewzel awal s tugna-agi : « mmel-iyi-d amek tga rradyu tesɛid, ad ak- mmleɣ timeti wuɣur i tettikiḍ ».
Rradyu Jurjura i d -ilulen ass-a , tusa-d akken ad teɛmer rreḥba iferɣen, akken ad as- teg tilist i tsusmi, akken ad as- tger irebbi i tusna akked yidles, akken at wawal deg-s ad afen leqrar. D wa i d asirem s wacu i d- aɣ i d- iqubel ass n tulya n rradyu-agi i yerǧan aṭas n yinaẓuren n temnadṭ n Jurjura.
Ait Slimane Hamid