Mi iγab ubriq-nni amcum γef wallen-is, tekkes aγbel yewwi-t uḥemmal, tdewweṛ-d γer Muḥend. Nettat tenwa ad t-id taff iheyya-d iman-is akken ad mmegren iγallen, maca mačči akken ay tṣaṛ. Tufa-t-id : udem-is yeqlelles, tawenza-s tekres.Yerfa fell-as imi i as-tekkes aγanim seg ufus-is, terna twezzeε-as tadwayt-is n ssmax, tḍeyyeṛ-as tiferret ideg yettaru. Wama abriq-nni εzizen i as-tezzeḥlelli seg ṭṭaq, amek ara yesbeṛ fell-as ! Seg wayen yerfa, iεeyyeḍ fell-as : Ṛuh ad tṛuḥeḍ akin fell-i a lmuṣiba neγ ad kem-rreγ d agelgal n yidammen !
Nettat γas akken tugad-it, tεel lkuṛaj, tuẓa γer γur-s, tessers afus-ines γef uqeṛṛuy-is teslufay-as. Tesselḥay iḍudan-is cwi cwi ger wanẓaden n ucekkuḥ-is. Imiren Muḥend yuγal-it-id ṛṛuḥ, yerra-d nnehta, tezri-t liḥala-nni i t-irekben, yuγal wudem-is yennecṛaḥ. Yessuter-as smaḥ i Dasin, yemmeγ fell-as iger-as iγallen, ma d nettat tefka-yas-d taqemmuct.
Qimen aṭas n lweqt nutni akken myalsaqen , armi d ayen kan yebra-yas s talwit. Iεedda imir yuγal γer umkan-is ; yewwet γer leqjeṛ yejbed-d attefttar akked yimru, yebda yettaru.
Dasin mebla ma yessawel-as, tuli γer yirebbi-s teqqim tger-as iγallen. Tmuqel-it s tmuγli n tayri, tεedda tenṭeq γer γur-s s nnecṛaḥa :
A Muḥend-iw ay amyaru
Nekk ad iniγ
Ma d kečč ssefru
-Netta yerra-yas-d : Mmiṛd !
* D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010