Teγzi n tudert tessawaḍ Bab-is ayen i d- yedder, ayen iwala yettuγal-as am win yeqqes uzrem, yettagad ula d aseγwen. Dayen i yettrebbin deg-s tamuγli meẓẓiyen i kra n win yugar di leεmer ad tafeḍ yesseḥbibir tettecbibir γef wayen yebγun yili-d. Qqaren, win yeddren tudert-is ulayγer yeqqules γer tudert n wayeḍ myal akud s tarwa-s, myal tarwa s tmuγli-s, yal tamuγli s wallalen-is. Gar umeẓyan d umeqran akud yettaf iman-is yettaḍsa yeqqar: wali tura wihin yugad teγzi n tudert, wihin yeqqar awah a teγzi n tudert maca γas tudert tesdukel-iten, tamuγli tebḍa-ten, yal yiwen anida ijebbed. Netta akken bγun jebden i tudert ur ffiγen ara.Mgaraden amek ara idiren, d acu n tudert ara idiren. Netta limer d lebγi yal wa ad yidir i wayeḍ, s wayeḍ. Temẓi di temγer, temγer di temẓi mi ara dduklent ad d-fkent tamuγli n yimmal ara d- yezgen i kra n win yeddren, maca i sin d yid-sen tidet ẓẓayet, yuεer leḥsab i tifin…
Bujemεa: D acu i tennam….ah (Akli d Dda weεli uzzlen-d γur-s zzin fella-s, wissen d acu i d asen-yenna Dda weεli yeɣli ɣef tgecrar am win iserεen ).
Akli: (s ucekker d ucuffu uqendur) Aziɣen Tettxemmimeḍ, ula d kečč ur t xusseḍ ara.
Bujemεa: (yessuli deg yiman-is yettmaεin i Dda weεli) ɣas tiṭ ur tettwali Ara, afus ur yettaru yara, allaɣ γur-s d acu ara d-yini.
Dda weεli: (yeṭṭall-it-id; yeskeɛkeɛ-itt) D aya kan i d aγ ixussen. Nniɣ-ak: wiyi yellan akka kksen iɣes i ttmer.
Akli: Dɣa d ta i d sseba tamezwarut i sara-d-nexleq akabar a Dda weεli.
Bujemεa: D acu εni i d akabar ? Kečč d akabar, nekk d akabar, wayeḍ d akabar…d wa i d akabar.
Dda weεli: Imi kečč d akabar, nekk d akabar, wihin d akabar … ihi yal yiwen yessali d yeɣzer-is, yawi d webrid-is, yenher aɣyul-is.
Akli: Akabar a Dda weεli, d win ara d-ijemεen s kra n win i tḥuza tyita, tin yernan ɣur-s wiyi yellan akka εyan medden deg-sen. nekni.(Yessuli deg-yiman-is, yerna-d Bujemεa γur-s ) ma nesbedd-d akabar ad yesdukel merra imdanen.
Bujemɛa: (deg waken yedha d wakli yuγal am win i d-yukin, yewhem) Amek, amek? Rebbi i d aɣ-d-ixellqen yessemgared-aγ-d, yiwen n bututu akka am kečč, ad teksuḍ tacacit ara d-yekfun merra i yemdanen !
Akli: A mačči d aya i bɣiɣ ad d-iniɣ a Ɛmara, a lheẓẓ n yigran.
Bujemεa: D acu ih?
Akli: Bɣiɣ ad d-iniɣ, belli wiyyi i yellan akka εyan yemdanen deg-sen: tella kra n lqella i yekksen, tella kra n lehna i d-sersen, Aqel-aɣ nettwali: Amesbaṭṭli yettzad di llbaṭel-is, amerkanti tettzad tawant-is.
Bujemεa: Yeṭṭunnez
Akli: Ma d aẓawali yettzad di lḥif-is.
Bujemεa: Ayya fell-as: (di sin yidsen amzun d tamesbanit i d-sekkren)
Iyyaw iyyaw ay atmaten
Afus deg ufus ad nemεawan
S lbaraka n yimaziγen
S lbaraka n yimaziγen
(d ccna ara tt-id ccnun .ad cennun maca ad d- ttmeεεinen i Dda weεli, Dda weεli yerra ɣer daxel yessusmen, yuɣal ula d netta irfed-as ula d netta s tin n leḥrara: A yemma ṣber ur tettru n Farid εli)
Dda weεli: A yemma ṣber ur tettru
Ma d ttar ad am t-id-rreɣ
Di lεezza-m hder ternuḍ
Deg udrar aqel-i εusseɣ
Deg udrar ad t-naḍaḥeɣ
Ur seqqar mmi-m yenṭṭer
Ur jerreḥ deg wul-inem
I usemmiḍ aqel-aɣ neṣber
Wala wid i tennḍen am uzrem
Akli: Yiwen ur yezmir ad aken-yefhem
Bujemεa: Ad tenɣem, ad twajhem
Akli: D acu, d acu i d as-d-yegran i yiles?
Yeffin ur yenğir targa
D acu-tt lemḥibba uxunfes
I d-aɣ yeẓẓaẓin ula akken tezga
Anida-t ṣṣwab a lkayes
Di zzman deg i tmal ttεebga
Bujemεa: ṣlat ɣef nnbi yal ass
Awal yeččur ikufan
Deg usirem nesgem layas
Nessemsad s amsed yeḥfan
D aqesser yezzin i lkas
D at wawal i yemyufan
Sseḥsaben i uḍar bu warkas
Ad t-rren am wid-ak yeḥfan
Akli: Begsen, begsen i ṣṣwab s uqeffal
Serḥen-as ad icali
Win d-yemlal ad as-yeggal
Tjerduεt tezga teɣli
Tikwal amzun d aḍebbal
Tikwal amzun d aḥwayli
Tidett, d tidett mi d-temlal
Din adebbuz ad yeḥlelli
Bujemεa: I d-aɣ-yenɣan d iceṭṭaḥen
Yugin ad beddlen tikli
S kra n win ara d-yasen
Ad as-gen abrid ad yali
Ay at wid, ay at wid i ten-yettamnen
Ɣas d ass-a ṭill-t ɣer yiḍelli
Yal tikelt deg ara –nefḍen
Γef tuyat-nneɣ i d-ɣelli
Akli: Tawwurt n llberj n leɣriq
Tawwurt-is tga llmibriḥ
Yal yiwen d akken yettmelliq
D tidi n tmurt i d-tessniffiḥ
Igig ɣur tcudd rqiq
Akka i refden acewwiq
Bujemεa: Neεya, neεya di tuddza n waman
Akli: D llazuq n dadda meḥduq
Bujemεa: I wezrem win yefkan laman
Akli: Ma yeqqes-it uli d-yemuq
Bujemεa: Neεya deg ucuffu uqendur
Akli: D tanzarin uceṭṭiḍ
Bujemεa: Ma ur rrwin dehmen agur
Akli: Wamma itri yenza i yisiḍ
Bujemεa : Neεya di tikli usafu di lkanun
Akli: D tirrugza i d aɣ-yessexnunusen
Bujemεa: Neεya di lemεahda yettwattun
Akli: D usiḥel, d usiḥel n yimurḍusen
Akli d Bujemεa: Neεya, neεya, (ad ɣlin ɣef tgecrar ) neεya, neεya,neεya (Bujemεa ad iqqim akken akli ad d ibedd)