Taɣiwant n Timizart deg temnaḍt n At Jennad thegga-d s lemɛawna n ugraw aɣelnaw n yimjuhad yiwet n tejmilt i Lkulunil « Iɛazuren Muḥand » yettwasnen s yisem n Si Saɛid Briruc ilmend n umulli wis 57 n umenzu n Unbir 1954.
Ahil n tejmilt yebda taṣebḥit , imi i d -temlal twacult tagrawlit akked d yibermaniyen( citoyens) i d- yekkan sya d sya ɣer tsutelt n tɣiwant iwakken ad awin abrid ɣer ugni n timlilin anda tella teqrabt n yimeɣrasen. Din, deg ugni n timlilin ara ters tmeqqunt n yiǧeǧǧigen ɣer usebdad yellan d aktay n kra n win yefkan idammen-is d asfel ɣef tlelli n tmurt. Ɣef lɛecra , tamugent tella-d deg aɣerbaz n watmaten Ziyan di Ssuq n Lḥed akken ad yili usarag s wazal-is ɣef tudert n Si Said Briruc akked d utekki ines di tegrawla n 1954. Aṭas n yilmeẓyen ur nessin ara anwa id Briruc d wacu yexdem neɣ d acu yella. Deg usarag -agi ufan- d belli Briruc inuḍeḥ ɣer tama n Krim Belqasem, Uɛemran, Muḥemedi Saɛid, Ait Ḥamuda Ɛmiruc… am wakken diɣ i fehmen belli Lkulunil Iɛazuren Muḥend yella deffir tedyant n ufrux inili( opération l’oiseau bleu) s ddaw leɛnaya n Krim Belqasem.
Briruc, aṭas n tikkelt i d- yenser seg yimi n tlafsa. Amedya, asmi yemneɛ si lmut mi tyuɣ lḥal deg « zabri » deg yiwen n uxxam n twacult n Ait Ahmed. Aṛumi, ifaq s tilin-nsen din netta n yimeddukkal- is Krim, Uɛamran d Moḥemedi Saɛid. Axxam deg fren yettwasirkli, maca lqedra tebɣa dakken taɣuzi ny iserdasen iṛumyen akken ad skeflen azabri-nni, teḥbes uqbel ad leḥqen ɣer ɣur-s. Briruc, yella d ameɣnas deg ukabar n PPA deg useggas n 1942 am akken yella d aɛeggal n tisudest tufirt ( O.S). Yella diɣ seg wid i d-iheggan tixazabiyin magal leḥkem n Franṣa deg umenzu n Unbir 1954. Sin akkin, deg useggas n 1957 yuɣal d lekmanda ɣef Lwilaya III tamazrayt . Tajmilt i d as- yuɣalen i Briruc tusa-d di lawan- is acku, imraren n tatut teddun ad gen aẓeṭṭa n war lewhi ɣef uktay n uɣref. Ass-a, ilmeẓyen n temnaḍt n At Jennad mlalen d umezruy i ddren yimawlen- nsen, ttwanecden ɣer ugni n tirrugza, ahat lḥeb yeɣlin ɣef wakal ad d-yeǧǧ ixulaf !
Ait Slimane Hamid