Deg imi i tečča tiyita, tennecham, terra aḍar, tellez. Xas ul-is yemmal abrid ɣer win i as-yeččuren tiṭ, tenɣel tiṭ maday teččur! Yal tameddit, tettemlil d yiman-is akin i igenwan. Din kan i teɣɣar ayen yuran deg yedlisen n lbaḍna. Imi ara d-ters tsusmi, ad d-teddem ccac amellal gar ifassen-is, ad asent-anef i tmiqwa n waman n wallen-is ad arunt deg-sent i bɣant. Tira s imeṭṭi d tira n wul, d tira n uḍar ur neɛyi di tikli, tikli d amennuɣ, d acqirrew n yiman-is, d acqirrew n zzman iran ad as-yesbur s wadal, rrezg-is ad itecceg, ad d-yeṭṭilli ur d-ikeččem. Ala ayen akken i tt-yessidiren ara s-yekksen tucerka s ufus iɛerden tibninanin, s yiles isersen tiẓidanin ɣef twenziwin. Ad tidir tirga-s akken tent-yedder Yidir s uzeɣbub n usirem yezreɛ Salem Zénia, tafrara. Azeɣbub ad yefti, ad d-yefk atma-s, ad iqerraɛ aḍu yettawin tiɛeqqayin n rrmel yesqerqec yiṭij asemmaḍ. Akin i igenwan, ayen akken yenzan, ad t-id-cefɛen wussan…
Zira