Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
Teddem-d yir meṭṭu icettiḍen ttlsunt tilawin, mi ara ferḍent neγ ttḍummunt leγbar seg iduynan, teffer yes-sen taglimt-is, tḥennek akk iman-is, almi d as-teεreq lğerra n wudem-is ula i nettat s timmad-is, terra tatteffaḥt-nni γer tculliḍt, tbubb-itt am bubriṭ, tuγ abrid-is tuγal s axxam n sa iymuyuden, d-yezgan zdeffir acḥal d tiẓgi yakkd sa idurar.
Tewweḍ kan, teεna tawwurt, tesqerbub tesṭebṭub deg-s.
Nuja ideflawen tessufeγ-d aqerru-s si ṭṭaq, tenna-yas-d:
» Ssuref-iyi a yemma tamγert, ur zmireγ ara yakk ad am-d-ldiγ tawwurt, ugin-iyi yeymuyuden di sa yid-sen! »
« Ulac akk fell-as a yelli εzizen, ulac fell-as, kkes anezgum i wul-im » i d as-terra, tenna-yas daγen, « Titteffaḥin-iw ur tent-yuγ ur tent-yebli, simi d tameddit iban ad nzent akk, kemm a yelli ulayγer akk taγeḍ fell-i, ax ad am-fkeγ yiwet d tunṭict, uḥeqq jeddi Mangellat ar tt-tuklaleḍ s sser-nni-inem yessemḥiḥiden ula d ulawen n at laxert! ».
« Xaṭi » i d as-d-terra Nuja ideflwen, « Ur ttaṭṭafeγ ula d kra seg ufus aberrani daγen, ula γef wannect-a ugin-iyi! ».
« Tugadeḍ ad am-ten-sseččeγ? » i d as-terra temγart, « amalah a leεqel a yelli, awer nili seg yemcumen! Teẓriḍ amek ihi, ad bḍuγ tattefaḥt-agi zdat wallen-im, atan wali-d ihi, azgen-agi azegzaw d ayla-w, ad t-teččeγ zdat-m, ma yella kra yellan, ad kem-zwireγ mi ara yeffẓeγ iles-iw, azgen-agi yebbxebxen d azegga&gamma,; s uqerru-w ar d ayla-m, ihi tura zwareγ-kem γer limin! ».
yettkemmil