Iḍelli tafejrit i neṭṭef abrid ɣer Lmuradiya. Akken kan d-neffeɣ taddart, tebda tzehher tkerrust n Lbacir la soupape.
– Acu akka yuɣen ṭumubil a dda Lbacir ?
– C’est rien ! Akka dima i txeddem, mara tekker sbeḥ. Ad yeḥmu kan umutur, ad d-tuɣal ɣer leɛqel-is. Ah kan tura ar kun-tezuzen Merquca.
Ih, Merquca i d as-yeqqar i tkerrust-is. Acḥal n lesnin-aya nettat ɣur-s. Yuɣ-itt deg useggas 1980, si Sonacome n Chadli. Seg ass-nni ur d as-yebri. Iḥemmel-itt am rruḥ-is. Ur d as-teqqareḍ ara ɣef wuzal i yettmeslay mara ihedder Lbacir ɣef Merquca. Win ur nessin Merquca, ad as-yini : “arezg-is tmeṭṭut-agi yesɛan lbacir la soupape ! ”
Ḍrifa n Laɛziz, tameṭṭut(en chair et en os) n Lbacir, nɣant-tt tismin, teddiguti seg liḥala-nni. D’ailleurs, ass-nni, tɛedda ttnasfa n yiḍ, tbedd Ḍrifa tama n tewwurt tettraju Lbacir. Mi d-yekcem, tenna-yas :
– Ass-agi ad ttnefru a Lbacir !
– D lxir a madame ?
– Tamezwarut, mačči “madame” i d isem-iw : Ḍrifa, nanna-k Ḍrifa …!
– S leɛqel kan…
– Ur d-yegri leɛqel i tin yesɛan takna…
– Amek ???
– Ih, a Lbacir Merquca d takna ! Lukan meqqar d tarwiḥt, d taksumt, d timeccacin, d taṭṭucin, d tacebbut….yecbeḥ ! D uzal asemmaḍ i tḥmleḍ a la soupape ! Ass-a dayen, xtir gar Merquca d Ḍrifa !
Awal ur d-yuli ara Lbacir. Azekka-nni tafejrit, uqbel ad d-taki Ḍrifa, yeffeɣ. Ɣef lewhi n lɛcra yuɣal-d s axxam deg ufus-is taqendurt d tmeḥremt . Yefka-tent i Ḍrifa u yecna-yas : “ne me quitte pas, il faut oublier….”
T.Ould amar