Yeɛreq yixef-is(IV)

Teγzi n tudert tessawaḍ Bab-is ayen i d- yedder, ayen iwala yettuγal-as am win yeqqes uzrem, yettagad ula d aseγwen. Dayen i yettrebbin deg-s tamuγli meẓẓiyen i kra n win yugar di leεmer ad tafeḍ yesseḥbibir tettecbibir γef wayen yebγun yili-d. Qqaren, win yeddren tudert-is ulayγer yeqqules γer tudert n wayeḍ myal akud s tarwa-s, myal tarwa s tmuγli-s, yal tamuγli s wallalen-is. Gar umeẓyan d umeqran akud yettaf iman-is yettaḍsa yeqqar: wali tura wihin yugad teγzi n tudert, wihin yeqqar awah a teγzi n tudert maca γas tudert tesdukel-iten, tamuli tebḍa-ten, yal yiwen anida ijebbed. Netta akken bγun jebden i tudert ur ffiγen ara.Mgaraden amek ara idiren, d acu n tudert ara idiren. Netta limer d lebγi yal wa ad yidir i wayeḍ, s wayeḍ. Temẓi di temγer, temγer di temẓi mi ara dduklent ad d-fkent tamuγli n yimmal ara d- yezgen i kra n win yeddren, maca i sin d yid-sen tidet ẓẓayet, yuεer leḥsab i tifin…

Bujema: Terwi tebberwi

Tettawi ur d-tettawi

Teɣli telleɣwi

Yereq ur d-iban yixef-is

Akli: (iweha) Atan yixef-is.

Bujemεa: Anida-t?

Dda weεli: Amek-it?

Akli: D azegzaw, d azegzaw am lebḥer

Dda weεli: Aman ur ɣur-sen iγemman

Bujema: Ahat d igenni

Dda weεli: D igenni! Ihi d ayenni, yiwen ur yezmir ad as-yaweḍ, yiwen ur yezmir ad d-yaf ixef-is

Akli : Meqqar, meqqar d igenni.

Igenni nessen ad nεenni

Ayen yellan ad t-id-nini

Mi nessaweḍ nedda tirni

Yal yiwen d akken yettani

Dda weεli: Ih, yiwen d nekkini, limer mačči d nekkini d acu ara ken-id-yessiwḍen ɣer waya-ini. akken kan i d-luleγ gan-iyi tameɣra yennerna wergaz di lḥara, nekk cfiɣ-d ttruɣ

Bujemaε: (i wakli) fhem-it tura (i Dda Weεli) waqila s temɣer i d-tezzewreḍ

Dda weεli: Anida i yeḥsiγ akka yak i d-qqaren

Bujemεa: Ur telliḍ d amenzu, ur telliḍ d aneggaru, ugur di win i d-yemmuten

Akli: Win d-immuten ur d ilul ara

Bujemεa: Amek Ɛmer Muḥ Muḥ iḍelli i yerna weqcic ɣur-s kečč teqqareḍ

Dda weεli: Yessaweḍ-d tarwiḥt?

Bujemεa: A yemmut

Akli: Ur d-ilul ara ihi

Bujemεa: Win d-ilulen ilul-d, yemmut neɣ yedder; i yettuγaḍen d kečč yemmuten teddreḍ.

Akli: erra ur d iyi-d-reggem ara, amek! Allen-iw Sbuεrurent, tuyat-iw ssewḥacent kečč teqqareḍ temmuteḍ nekk d amuddur

Bujema: Isaḥ-ik-id ad temmteḍ tugiḍ

Akli: Akka i d axenfuc! Ad d-tiniḍ d axenfuc-nni n Tgerfa, ad temmeslayeḍ kan ad yexser igenni

Dda weεli: (am wakken iqeḍ-it-id deg usawen) Ma ara yexser igenni ttluɣun waman

Bujema: (ula d netta s turart) ur d ufiḍ ara ixef-is

Akli: Ixef-is, ixef-is yereq ass-n akken i d-tlul

Bujemεa: Amek! Ula d nettat tlul-d temmut!?

Dda weεli: (ur yeẓri) Anita ta?

Akli: (s ukeεez) Anita! (i Bujemεa ) Weεli tura, yerra iman-is am wakken ur yeẓri , ur yeḥdir akken qqaren at zik : amcic yettbuzzug ɣef win i d as-yeslafayen

Bujemεa: Amcic meqqar ɣezzif ufus-is yettbuddu deg urwiḥ-is, wamma wa… teḍra yid-s am yeqwi, win yesṭṭubblen yes ar d- irreẓ ad t-iḍegger.

Dda weεli: Ur teččiḍ ur terbiḥeḍ a yul ur temniεeḍ di cḥani.

Akli: Arju,ur s kiddib ara ɣer ccib-ik.teččiḍ tesswiḍ, Tessagreḍ; tin yernan ɣur-s tsefḍem cḥani ɣur werur n win yennumen ccḥani ( iwet Bujemεa γur uzagur )

Dda Weεli: D tayda-k di&gamma,; ad iyi-mneε Rebbi deg wayen ur giɣ, wamma ayen giɣ bniɣ fell-as

Akli: Zzi tenḍeḍ, awi terreḍ waqila ur d iyi-tessineḍ ara?

Bujemεa: A mačči di tmussni i d-teqqim ma yessen-ik neɣ ala .ini-yi-d d acu-t wedrar-a i d-tezzuɣrem akka ? Amehbul i ibubben tawwurt, deg tjebbujt ɣer tulmut, ad as-tiniḍ mačči s tmaziɣt i tettmeslayem. (Yettmeslay i wid i as-d -yezzin) kkret, kkret fell-awen ad nerwel, imdanen εyan deg gelman-nnsen wi mazal ad zuγuren adrar. D acu-ten yemdanen am wi? (yeṭṭal ɣer yigenni yerfed ifassen-is ideu)a Rebbi, a Rebbi arra wiyi, ur d-rennu yara am wi, neɣ s ddaw wiyi, wamma ma s nnig wiyi tameddurt, tameddurt i nnger ala tettheyi

Akli: D tidet! tidet d nnger. menyaf tidet Yesseqraḥen, neɣ lekdeb yessefraḥen?

Bujemεa: Anita ta?

Akli: Tilelli, tilelli yell-is n yiḍelli, i wass-a anida teɣli?

Dda Weεli: Tilelli yal yiwen akken i tt-yettwali.wa d iṭij, wa d ayur, wa d tafsut, wa d igenni.

Akli d Dda Weεli: Ah a tilelli

Tudert teqqel-i d ilili

Ah a tilelli, Iẓri-w iger-d leḥmali

Bujemεa: (s yimeṭṭi) Amek a dda Weεli drus i tettruḍ fell-as, drus i tecniḍ fell-as? ula d isem-is mi ara d as-tesleḍ ad tbeddeḍ ad teccirweḍ

Dda weεli: Nnan at zik: ttxeṭṭiben-tt εecra, yettawi-tt yiwen

Akli: Ihi, truḥ!

Bujema: Ay aḥlil a Dda lwali, i nehber ur d-nessuli

Dda weεli: Tilelli tettruḥu tettuɣal, yal yiwen D Abrid yefren akken ara tt-id-yerr

Akli: Ahat d tirezzaf i terzef

Bujemεa: Aniwa i tt-yuɣen? Melmi i tedda d tislit?

Dda weεli : Ass -n , ass-n akken yeḥma useqqi, imdanen ttmettaten, sfalen-d ssfalayen,Yiwen seg yiqeffafen yuyes ad iwali udem-is, simi i d-as-yekkes aɣummu i wudem-is xeṭṭaf lerayes ur yelli d aezzam, yeddem-itt gar iferrawen-is iruḥ

Yettkemmil

Akli Tamazirt