Teṭṭeṛḍeq imiren d taḍṣa. Teḍṣa armi d ayen teεya , tεedda umbeεεed tenna-yas :
A Muḥend-iw ay amyaru
Nekk ad ssefruγ
Ma d kečč aru.
-Muḥend mi as-yesla akka, yecmummeḥ wudem-is, ires lxaṭer-is, iserreḥ ufus-is, yuγal ad ikemmel tira. Dasin yellan γef yirebbi-s, tettawi-yas-d am leεwayed-is timucuha, timucuha-nni ur nettfakka, tid n wat zik d tid n wat tura d tid n yimal iγer mazal ur newwiḍ ara.
Wwin-d akken tanafa deg usikel-nsen armi i tensa tcemmaεt i sen-d-yettaken tafat. Tεedda imiren Dasin ad tezzer di lqaεa i wakken ad as-tanef i Muḥend ad yeṭṭes. Muḥend yellan ur yeεyi ara yebγa ad ikemmel tira, ihi iεedda yemaẓẓed akken ad yecεel llamba n trisiti ; γas ulamma netta yekṛeh tafat s waṭas , yesmenyaf axiṛ ad yaru γer umezγiγed n tcemmaεt , meεna terra-t tmara imi iḍes iṛuḥ fell-as yerna ccmeε yekfa-yas. Dasin mi twala-t akken yettendeṛkal di tallest iεummen akk taxelwit-is, yettnadi di lḥiḍ γef teqfilt n llamba, tekcem-itt tugdi, tebγa ad t-id-teḥbes imi tḥulfa dakken yella kra n umihi i ten-yettṛajun. Tekker tluεa-t : A Muḥend, d ayen-ik tura ! Σeddi ad teṭseḍ, aqli-k teεyiḍ ! Egg lbaraka deg wayen i turiḍ iḍ-a ma d ayen yeqqimen eǧǧ-it i yiḍ ara d-yasen.
Muḥend teγleb-it leḥṛaṛa, Dasin ur as-yesli ara, iεedda yecεel tafat.
Siwa kan i d-tebreq llamba , yedda-d yid-s yiwen n ṣṣut amzun d kra n tγawsa i d-yeγlin seg sseqf teblesq-d γer lqaεa ! Muḥend imir yeṛεaεec seg lxelεa, armi i d-as-tekkes isaked akken ilaq , tečča-t lwehma deg wayen iwala: iwala yiwet n tlemẓit teḍleq di tlemmast n tγerγeṛt, nettat telsa llebsa d tamellalt amzun d tislit, udem-is d azeynan am leḥrir, acekkuḥ-is d awṛaγ yettarra-d izenẓaṛen n tafat, allen-is d tiẓeṛwalin am yini n tegnawt yeṣfan. Muḥend tefka-yas axettaṛ, yuγal yeskeṛ deg wayen i as-teεǧeb, iεedda yekna γer γur-s akken ad tt-id-yesγim γas ma mazal-it akken yekkukra. Ma d Dasin tbedd kan akken tečča-tt lwehma, tessers afus-is γer lḥenk-is teqqaṛ deg ul-is : » I ta daγen amek ara tt-sḍiceγ ? Tixxeṛ-as kan ad as-ggeγ am tmezwarut-nni neγ kteṛ, imi εni ur yi-tessin ara d acu-yi, nekk umi sawalen Massa Dasin, win teqqes ur tettdawin « .
yettkemmil
*D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010