Houacine Chawki d anelmad di tesdawit Mulud Mεemmri, aseggas amezwaru, yextar ad iγer tamaziγt. Meεna netta d ameεḍar, yeṭṭef-it waṭṭan iwumi qqaren “La myopathie de Duchenne” seg wassmi yesεa tlata n yiseggasen di leεmer-is, γef wakken i aγ-d-nnan yimawlan-is. I wakken ad ikemmel amecwar-is di leqraya, imawlan-is ssuturen deg yimḍebbren ad asen-gen ttawil di temdint n Tizi Wezzu. “ Kran akk yeγra, ama di lakul amenzu, ama deg ulemmas neγ di tesnawit, d yemma-s i t-yettbibbin γef uεrir-is seg uxxam γer uγerbaz. Tura, aql-aγ neḥṣel, ur nufi amek ara t-id-nettawi seg Wat Waban γer Tizi Wezzu. Ihi, neṭṭalab di lwali neγ le DAS ad aγ-gen ttawil. Ilaq ad d-afen tifrat i temsalt-a ma ulac ur yezmir ara ad iγer mmi-tneγ. Ur nezmir ara ad nqabel taswiεt s lmesruf. Nekk aql-i akken ffγeγ la retraite, lliγ garde communal. Lhiγ-d d aseḥbiber γef tmurt, ğğiγ yemma-s tettemḍerkal weḥd-s γef mmi-s. Zyada γef tiwin-is γer lakul, d nettat i yettarun timsirin-is. Tettγimi din deg uγerbaz, tettawi-d izmamen γer yinelmaden-nniḍen, tettaru-tent. Ma deg yiḍ, ilaq ad d-tekker γur-s ma ulac tmanya n tikal.”. I aγ-d-nnan imawlan-is mi ten-nemlal di temdin n Tizi Wezzu. Aṭas i sḥassfen γef wamek i ten-id-qublen kra n yimḍebbren ẓran. “Ulac lxir di tmurt-a, s anda nesṭebṭeb teγleq tewwurt.” Ma γef usirem n mmi-tsen nnan-d.”limer ad yaf ad iruḥ γer tmurt n lγerba, dinna ttqadaren win ihelken, sεan izerfan.”
Nessarm kan tiγri n twacult-a ad taweḍ wid teεna temsalt. U ad lhun deg unelmad-a imi d lwajeb γef tmurt ad tesγer arraw-is, ad asen-tefk tanezduγt. Ma i win yebγan ad yini awal i twacult n Houacine, ha-t-an wuṭṭun n tilifun: 06 68 62 56 57.