Deg yiwet n temlilit n yimura n ddunit ɣef tutlayin yettwaḥeqqren anda yettekka Mulud Mɛemmri, yal amaru ifka-d tidmi-s…Mi d-iṣaḥ wawal bab n tewrirt yettwattun yenna : « deg Lezzayer, agdud d Amaziɣ maca, wid i iḥekkmen tamurt gedlen aselmed n Tmaziɣt ». Yerra-yas-d yiwen umaru n tmurt n’Lhend’ : « tafelluct (tamedwast) medlulet,maca ansi i tɛedda tettaǧǧa-d tezdeg…Ihi ili-asen d tafelluct i yicenga-agi n Tmaziɣt, sizdeg-asen allaɣ-nsen s tmusni”.
Ihi, nezmer ad d-nini dakken, taggara-a Mɛemmri yewweḍ ɣer lebɣi-s, allaɣen n yimdebbren uraden segmi i d-yewweḍ usali s-yur umeqqran n yimṣulṭa Mass Hamel anda i d-yefka lameṛ i yimḍebbren n yigezda(lwilayat) iwakken ad heggin iman-nsen i ulmud n tutlayt Tamaziɣt.
Aya, yezmer ad aɣ-d-yesmekti yiwet n tmeɣra i yexdem Lwennas ad t-yerḥem Rebbi di tzeqqa n Atlas di Lezzayer tamaneɣtdeg useggas n 1985 mi d-yenna: ”Walit kan, zik mi d-nebder tamaziɣt ad aɣ-awin ɣer leḥbus, tura ad ncennu ɣef tmaziɣt yerna ad ttɛassan fell-aɣ !”
Akken i ttbeddilent tsutwin, i ttbeddilent tmuɣliwin. kra n wayen yellan akk d aɛewwiq deg yiseggase n 70 yufrar fell-as uɣebbar, almi yessaweḍ umennuɣ ad tili tmaziɣt deg yiɣerbazen, tisdawiyin rnu tutlayt taɣelnawt di tmendawt.
Di Lmerruk, anda tutlayt tamaziɣt tuɣal d tunsibt, iwulem ɣef uneɣlaf amenzu ad yissin ad yemmeslay snat tutlayin: taɛrabt d tmaziɣt. Nekni, akka nella tura, mačči d aɣbel, Ouyahia yessen-itent ! Wissen kan ma yella ulɣu-a yerzan imsulta s tidet d nniya yesfan, bɣan-tt ad teṭṭef amkan-is deg tmendawt d tunṣibt am lǧiran-nneɣ n utaram neɣ yella wacu yellan deffir waya !
Mumuḥ Ɛezzuz