Inig ideg kecmeɣ umbeɛd mi nerwa aḥnunef deg tzemmurt-nni taneggarut yellan deg tiɣilt n lexla-nneɣ Iɣzer inalen, d inig aɣezfan, alqayan, ula d baba -nni iyi-d-ittmeslayen iɣil d taguni i gneɣ ɣas ulamma ttwaliɣ-t-id netta ikkaten si tegnit ɣer tayeḍ tizemrin i as-d-yeǧǧa baba-s s yeẓra; Wis kan ma d zzɛef neɣ d lxiq i as-igan akken? imi lɣella tenɣes , ma zik tettakk-d tzemmurt 4 ar 8 n tesnatin , tura tin yurwen ad d-tfekk azal n tacekkart, neɣ ahat d war lettkal ɣef tarwa-s labeɛda imi netta yedder i wakal, am akken i yedder s wakal ! Unageɣ am wakken yunag win iḥemmlen ɣer temdinin n tayri-s, unageɣ deg uɛeqqa n uzemmur amectuḥ i serseɣ gar yiḍudan- iw, wehheɣ-t i yiṭij, caxeɣ deg-s imi ɣer-s icuba ussan-agi mezziyen i d-sɛeddaɣ nekk d twacult-iw, Mmektaɣ-ten-id yiwen yiwen amzun d taktabt i qqareɣ ɣas akken si dqiqa ar tayeḍ kateɣ tiṭ-iw ɣer At tawacult- iw, ussan-a ssneɣ-ten, sliɣ-asen , skefleɣ-ten-id, fehmeɣ d akken ur nemyussan, fehmeɣ daɣen acimi i qqaren wat zik: «uqbel ad ak-teɣwu tmeṭṭut muqel qbel anta i d yemma-s!» tidet kan kukraɣ tuɣalin s axxam ɣas yid-sen cerkeɣ ssqef, ṭṭabla, nneɛma……. . Bɣiɣ ad yiɣzif yinig, imi akka i t-mazal tura bɣiɣ ad iyi-d-yini: Ad iyi-mazal! Tamecwart kan sliɣ i baba yessawal-d akken ad nuɣal s axxam, ɣas yembawel yinig ckenṭḍeɣ ɣer-s, bɣiɣ ad d-iɛawed baba asiwel akken ad as-t-rnuɣ d aktay i wussan -a. Iɛawed-d baba asiwel dɣa ndekwaleɣ-d seg umḍiq-iw, ma d aɛeqqa-nni yeɣli si gar yiḍudan, ɣas netta d agrireb i yegrareb deg uḥecraruf-nni, nekk d anfaḍ i d-nefdegh seg yinig-nni, unfeɣ-as ad iyi-yerwel, ḍsiɣ-as ,ur ɛerḍeɣ ad t-id-ṭṭfeɣ, imi iruḥ am tḥebbuyt n ukba deg ugadir.
Salima. D