Akud yettɛedday, ileḥḥu ur iḥebbes. Yal tikkelt d anwa lawan i d-yessiwiḍ, yettili deg tudert n umdan akken ad yezri, yettak tagnit i kra-nniḍen ad d-yelḥeq, ad yesɛu nnuba-s gar wiyaḍ. Dɣa, skud aql-aɣ deg tsemhuyt n umwan, taswiɛt ideg ttewriɣen wafriwen n ṭṭjur, simmal tettqarab-d tegrest i ineqqen ḥamu, i d-igellun s teqseḥ n usemmiḍ. Am yal aseggas ihi, am yakk lɣaci n tuddar-nniḍen, imezdaɣ n taddart n Ayt Smaɛel, bdan ttheggin i unneqlab n waddad n tegnawt i ara yilin deg wayyur n duǧember i d-iteddun. Imi qrib ad d-tekcem ccetwa, xeddmen seg tura leḥsabat i yiman-nsen, ttnadin war araǧu d uɛeṭṭel swayes ara zemren ad ɣelben tuɛert n usemmiḍ. Amek iban lḥal, mačči d yiwen n ttawil i yellan akken ad tecɛel tmes deg yixxamen-nsen, acku ifurnuyen yal wa s usenf-is, yal wa s wacu i d-yekkat s ḥamu. Ma yehwa-asen, ad ceɛlen s lmaẓuṭ, lgaz, trisiti akked yisɣaren, maca nutni seg ukuẓ-a n wagnayen, tuget seg-sen, fernen ad sserɣen isɣaren. Ayen i ten-yeǧǧan ad ḍefren agna-a, yekka-d seg waṭas n tmentilin. Ma nemmeslay-d fell-asent, ad d-nebder leɣla n lmaẓuṭ i irennun ssuma, yettzid seg useggas ɣer wayeḍ. Lqella n laman i yettilin deg yifurnuyen n lgaz, imi zgan dima snernayen-d tugdi ɣef wayen i izemren ad yeḍru, ad d-yessegri nndama. Ur ntettu, daɣen, ḥamu n yifurnuyen i ijebbden, i tetten xilla n trisiti, lameɛna ur ttqenniɛen wid i ten-ikesben amek ilaq. D annect-a i iqeddmen imezdaɣ n Ayt Smaɛel d kra seg wid i ten-iqerben, qeblen leɛtab n uzdam d ujmeɛ n yisɣaren seg tẓegwa n temnaḍt-nsen. Smenyifen tiɣin n yikumyan n yiqejmuren, wala ma ssuffɣen adrim-nsen deg ttawilat-nniḍen.
Kaisa Khalifi