Amdan yettwalin tiɣawsiwin s wudem n tilawt d tegzi, isteqsay iman-is, ɣef ayen yeɛnan iɣerbazen i yettwabnan zdat n iyberdan ama n tkeṛṛuṣin neɣ tmacinin. Aṭaṣ n yiɣerbazen i yellan deg wanak agi amcum. Ama di Tazmalt, Aqbu, Cerfa,…llan lakulat zgan-d ɣef yiri n webrid. Amedya, aɣerbaz amezwaru d ulemmas i yellan di taddart n Tuɣza di tɣiwant n Cerfa (Tubiret). Iɣerbazen-agi ttwabnan ɣef kra n lmitrat ɣef wbrid n tmacint yettawin ar Bgayet ! Inelmaden yal ass, sbeḥ meddi, zegren abrid. Tugdi tettaṭaf-iten deg tɛebbuṭ ! Aḥun a Rebbi ur yeḍri ara kra n diri yidsen. Maca ayagi izmer ad yili (dayen ur nessaram ara ) imi agnu-agi mazal-it akka ibedd. Imi arrac n lakul, neɣ ibalmuden, uqbel ad kecmen ar uɣerbaz, tturaren deg wefrag, ttazalen sya usya, rekḍen abrid tmacint, teddun nnig-s,…: Tturaren akw d « lmut » ! Atas n yibalmuden, mara d-fɣen neɣ ad awin abrid ar uɣerbaz, teddun nnig webrid deg uzzal, acku ur sinen ara, yerna ulac wara ten-ineṣḥen, ad ten-iwellah ! Agnu agi yerna nnig n kulec, ayen yeɛnan inelmaden i izedɣen deg tadadrt n Burar icudden ar tɣiwant n Bujlil (yesɛan tilisa ak d Cerfa n tubiret). Wigi, msakit, yeqqaren di Tuɣza, ilaq ad zegren, yal ass, tiqenṭert n webrid i wakken ad awḍen ar lakul nsen, neɣ ad d-uɣalen ar yixxamen nsen. Aṭaṣ seg warrac-agi i nemlal: tasa tergagi fella-sen. Deg tqenṭart-agi, amdan ma ur iɛus ara iman-is, tezmer tmacint ma tɛedda-d, ad teglu yes. Acku, tiqenṭert ur hrawet ara, tesɛa azal n kra terdasin i yettwaxedmen i wemsebrid. Di taggara, nessaram kan, sya d asawen, imḍebren ad bnun iɣerbazen ibaɛden ɣef yiberdan, i wakken inelmaden ad ɣren akken i ilaq lḥal, ur ttatafen ara tiɛebbaḍ nsen, myal tikelt ar zegren abrid n tmacinin neɣ win n tkeṛṛuṣin !
Syphax.Y