I lmend n lficṭa n useggas amaynut amaziɣ 2966, ass nni n 09 Yennayer 2016, aɣerbaz alemmas n tɣiwant n At Yanni, s lemεawna n tnemhalt n yidles n Tizi-Wezzu, thegga-d tirza i yinelmaden d tnelmadin ɣer wexxam n yidles Mufdi Zakariya di Lezzayer. Din ḥedren i wass amenzu n leqdic adelsan i d-ihegga Useqqamu Unnig n Timmuzgha i deg yeḥder uneɣlaf n yidles Σezzedin Mihubi d yiwen n uεeggal n tneɣlaft n ttrebga. Azal n 50 n warrac d teqcicin i d-yufraren s igemmuḍen n leqraya-nsen deg uḥric amenzu n useggas-agi n leqraya i d-yettwafernen akken ad ddun. Tiddefcect i dmen abrid akken ad awḍen ɣer Lezzayer ɣef lɛecra n Sbeḥ. Din, deg umraḥ n Uxxam-agi n yidles Mufdi Zakariya myufan-d d warrac d-yusan si tamiwin nniḍen : Imzabiyen, Icawiyen, Icenwiyen d icelḥiyen……….
Mi d-yewweḍ uqerru n HCA Si Lhachemi Σessad d uneɣlaf n yidles, tendeh tmeɣra s iḍebbalen, d cḍeḥ ansay. Mi tɛedda zzedwa-nni, rzan meṛṛa ɣer tzeqqa tameqrant. Din, Mass Σessad ifka-d awal n tazwara i temlilit-agi, i deg d-yesmekta belli deg iɣerbazen n 48 n lwilayt llant-d lficṭat i lmend n Yennayer. Ula d Mass Σezzedin Mihubi, inna-d belli ad yelhi deg tneɣlaft-is s usnerni d usefti n Tmaziɣt. S yin mi d-yemmeslay uɛeggal n tneɣlaft n ttrebga, bdant trebbaɛ n cḍeḥ, ccna, d usenɛet n tmeɣra n uyrad. Akken tessaweḍ temrilt d lweḥda uzal, ɛeddan inelmaden-nni rẓan tanalt. S yin rzan ɣer tebḥirt umi qqaren s tefransisit « jardin d’essai » n El Hamma. Walan-d meṛṛa ayen yellan deg-s, n cbaḥa n twennaṭ, igḍaḍ d iɣersiwen nniḍen. Tuɣalin tella-d ɣef rebɛa n tmeddit, s waṭas n lferḥ d unecreḥ deg ulawen d udmawen. Yerna aṭas n tugniwin i xedmen akken ad sen-d-teqqim lficṭa n Yennayer 2966 d asmekti. S yin i teɣzi n ubrid ɣer tmurt, tella-d s ccna, aqesser ɣef wayen walan d wayen ḥulfan. S yin, mi wḍen s At Yanni, yettwasuter deg warrac nni ad d-arun agzul ɣef wass-nni, d wamek t-sɛeddan. Tajmilt ad tuɣal i wid meṛṛa d-yefkan afus akken ad iɛeddi wass-nni di liser d tumert, ladɣa Tanemhalt n Yidles n Tizi-Wezzu, Mass Iften Ḥamid, anemhal n uɣerbaz alemmas n tɣiwant n At Yanni, d wid meṛṛa i yessudsen yerna bedden i inelmaden-agi akken ad sɛeddin ass igerzen di laman d liser. Nessaram ad ifriren warrac-agi, yerna ad nessiweḍ ad s-nelli tiwwura n tmusni.
sɣur:: NEDDIL Litisya, URAK Lina, ḤAMEDI Mira, BETTAN Nadeyya, SEDDUR Anayis, BUǦEMΣA Liza, LEWAǦ Sara, ǦENNAN Sufi, DERDAḤ Nazim.