Awal yettazzalen aṭas deg wussan-agi yezrin gar yimezdaγ n temnaḍt n Tizi-Wezzu d win yerzan lγella d ssuma n zzit n uzemmur, imi, ɣef leḥsab n wakken i d-nnan wid yettmeslayen s yisem n uḥric n tfellaḥt, lɣella n uzemmur d tin ur nessefraḥ ara aseggas-a, d ayen ara yeǧǧen ssuma n zzit ad tali.
Di 27 000 n yihiktaren n tzemrin i yeẓẓan di temnaḍin n Tizi-Wezzu, lγella ur tettεeddi ara s nnig n 200 000 n yiqenṭaren deg tallit-a akked yiẓid n wazal n 3,6 n yimelyunen n litrat n zzit. S wuṭṭunen-agi i d-tefka tmehla n tfellaḥt n temnaḍt n Tizi-Wezzu, ad naf belli deg useggas yezrin llan 820 000 n yiqenṭaren, i d-yessefɣen nnig n 14,5 n yimelyunen n litrat.
Tamentilt n lixṣaṣ n lγella, tcud γer waṭas n wuguren. Ugur amenzu d times yeččan merra tizegwa, wis sin d lixṣaṣ n waman ur d-neγli ara deg lawan. Ma d aneggaru d win yerzan aɣfal n yimdanen d waddud ɣer tzemrin-nsen ama s ufras, amenɣac..
Islam Bessaci