Arrac n Σin Timucent uysen melmi ara lemden tamaziγt deg uγerbaz
Ass n 29 unbir, yexdem Usqamu Unnig n Timmuzγa di lwilaya n Σin Timucent yiwen wass n usezrew γef wallalen n uselmed d tnumi n tγuri d tira s tmaziγt tatrart. Timlilit tebda s wawal i d-yefka mass Aziri Boudjema( anemhal n unadi ussnan di l’HCA) ideg d-yesken agnu (problèmatique) iγef ara d-awin isaragen yimazagen(spécialistes) yettikkin deg wass-a n usezrew, syin akkin yettunefk-as wawal i umaray amatu n lwilaya n Σin Timucent ideg yesteṛḥeb s tirza n Usqamu Unnig n Timmuzγa d wid akk i d-yerzan γer temlilit ama d imesragen(conférenciers) neγ d ineγmasen, imenna daγen timlilit ad tεeddi di tegnit yelhan. Seg tama-s mass Si Lhachemi Assad (imḍebber di l’HCA) yesnemmer aṭas lwali d unemhal n uxxam n yidles n Σin Timucent ilmend n wafud i d-fkan akken ad tεeddi temlilit akken ilaq. Deg wahil n tṣebḥit, yefka-d mass Zidane Yacine netta d massa Siham Souci(iselmaden di tesdawit n Bgayet) yiwen n usarag ideg d-seknen yewet n tezrawt s wazal-is ixedmen γef uselmed n tmahaγt(tatergit). Sin-a yimesragen, mmeslayen-d γef tixuṭṭeṛt i yesεa uselmed n tantaliwin n tmaziγt ladγa deg ayen yerzan aseqṛeb gar-asent s uselmed n wayen yellan yezdi d ussisen n wansayen d tewsatin n tsekla i yettawin yimsawalen n tantala i nra ad nesselmed. Tazrawt-a daγen γef wakken i d-yenna mass Zidane Yacine, ad teffeγ d adlis deg ussan i d-iteddun s uzwel:”Awfus i ulmad n tmahaγt”. Yefka-d daγen mass Kassa Hakim asarag yerzan taγult n usnerni n umawal n tmaziγt, netta d aselmad n tussna n tmetti di tesdawit n Bgayet, yemmeslay-d γef usenfar iγef ixeddem netta d Zidane Yacine, asenfar n usufeγ n umawal n tussna n tmetti(sociologie). Mass Hakim Kassa, yessefhem-d dakken tamaziγt ilaq ad tesεu imawalen di yal taγult, ma d ayen yerzan tussna n tmetti, llan aṭas n wawalen i yettwasqedcen yakan di tudert tansayt, acu kan yella wayen ara d- yawi yiwen seg tantaliwin-nniḍen n tmaziγt, d amedya, yessumer-d awal “amun neγ tamunt” i yebγan ad yini timetti s tantala tacelḥit deg-s yessufeγ-d tusnamunt (sociologie), amusnamun(sociologue). Tefka-d daγen massa Kania Rabdi (taselmadt n tusnalmudt deg ugezdu n tmaziγt n Tubiret) yiwen n usarag s wazal-is ideg d-tessefhem azal i tesεa tira d tγuri deg uselmed n tmaziγt, tesken-d acu n tarrayin i ilaq ad yetbeε yiwen akken ad naweḍ γer yiswi, d tamsalt-a daγen iγef d-yemmeslay tameddit mass Mohand Oubelkacem Khedam (amnadi deg umezruy d uḥric n usegmi), netta yemmeslay-d γef wassaγ yellan ger tutlayt d taytawt neγ tayetti (intelligence). Am akken daγen i d-yefka asarag mass Brahim Ben Taleb (netta daγen d amnadi di tusnalmudt), deg usarag-is, mass Ben Taleb yemmeslay-d γef usegzawal (dictionnaire) i d-yessufeγ γer tezrigin Ait Mouloud, umi isemma “Ccix-iw», asegzawal-a yegmer-d deg-s aṭas n wawalen ara inefεen ladγa inelmaden. I yefkan lwelha di temlilit-a, d tirza n warrac n usmil n uγerbaz amezwaru akken ad walin timlilit, arrac-a i ten-id yewwin d tanmehla n uselmed n Σin Timucent, deg awal i d-yefka win yettmeslayen s tenmehla n uselmed, yesban-d lfeṛḥ-is s temlilit-a yemmugen γef tmaziγt, imenna lukan ad yili uselmed n tutlayt-a yezdin akk izzayriyen deg yiγerbazen n lwilaya. Ma d igerdan i d-yerzan, yezga deg yimi-nsen ”wazul», wwin-d kra n yinaciden d yisefra yemmugen γef uγlan, d tunṭict ideg ten-εawnen yiselmaden-nsen, akken ad d-inin yes-s i yinebgawen ni d-yerzan γer lwilaya-nsen “ula d nekni d arraw n tmaziγt, nesεa azref akken ad nelmed tutlayt-nneγ tamγart”.
Seg Σin Timucent, Mokrane Chikhi