Snat n tnelmadin timaynutin n Bgayet, i yettwacegɛen aseggas-a, ɣer tesdawit Ferhat Abbas n Sétif, ttewtent assen-nni n lǧemɛa, ɣef lewhi n tlata n tmeddit (mbeɛd taẓallit n lǧamuɛa), s yiwet n lbumba n lekṛimujan (bombe lacrymogène), atɛeddi-agi, yella-d s ufus n yiwen n umdan, deg umnaṛ ar beṛṛa n tmezduɣt tasdawant El-hidhab 03. Tinelmadin-a yeqqaṛen deg ugezdu (département) n yizerfan, deg tesdawit n Sétif, mi kecment ɣer sbiṭar n temdint-nni, sersent acetki-nsent, mgal amesbaṭli-a ur yettwasnen ara, nnant-d dakken, aṭermul-agi yetɛedda fell-asent imi ur ttlussunt ara lḥiǧab. Yuɣ lḥal, ma drus nnig n 4000 inelmaden imaynuten n Bgayet, i yettwacegɛen aseggas-a ɣer tesdawiyin n Sétif d Jijel, acku ɣef leḥsab n yimasayen (les résponsables) teɛna temsalt, ulac imukan deg tesdawit n Bgayet, maca inelmaden-a akked yimawlan-nsen sɛan tamuɣli-nniḍen, anect-a iban-d deg yinejmuɛen ixeddmen yal tikelt, zdat n tselwit n tesdawit n Bgayet, ideg ssuturen tuɣalin ɣer tneggarut-a. Inelmaden d tnelmadin n Bgayet ttafen-d aṭas uguren, deg tmeddurt-nsen n yal ass, deg snat n tesdawiyin-a (Sétif d Jijel), anect-a dayen i nwala s yimmad-nneɣ, amzun akken imezdaɣ n snat n temdinin-agi, ur numen ara ttɛacaṛen neɣ ttmagaren, imdanen n wat yidles, i ixulfen win-nsen !
Farid Lahouari