Tineggura-a, icennayen ilmeẓyen iqbayliyen yal wa d ṣṣenf n uẓawan i yefren ad yecnu yis-s, wa d cceɛbi, wa d win n tmeɣriwin, wayeḍ d landalusi…atg. Ula d lmusiga n Rap, tebda tettaɣ iẓuran-is, deg unnar n ccna amaziɣ. « Space Rap Futurestice », d tasfift n ccna n Rap, i d-yessufeɣ ucennay ilmeẓi Zidane ɣer tezrigin Akhalaf Music. D album-is amenzu, ideg yecna 06 n tezlatin s tutlayt n teglizit d tefransist. Gar yifyar n tuɣac-agi, ad nsel i kra n tenfaliyin s teqbaylit, sya ɣer da.
Di tezlit tamezwarut, « Love Never end », anida i d-yettmeslay ɣef tmuɣli-ines ɣef tayri, yeqqar-as s teqbaylit: »Tayri-m d ssem ». Ma deg tezlit tis snat, « Digital System Hard », anda i d-ihedder ɣef yiman-is, s teqbaylit ijmel-d taɣuct-agi s wawal-a « Mmi-s tmurt, azul, azul ». Ma di tis tlata, iwumi isemma « No Play Game », d abumexluḍ gar tlata n tutlayin-agi: Taglizit, tafransist akked tmaziɣt. Yeqqar-as daxel-is s teqbaylit: « Kkreɣ-d d amaziɣ, ḥemmleɣ taqbaylit…atg ».
« Rap Deluxe », i d azwel n taɣect tis rebɛa, ma di tis xemsa « Space Rap Futurestice », anda i d–yettmeslay ɣef yimaziɣen d leqbayel, yeqqar-as s teqbaylit: « Neẓra nessen, nɛemed kulci… ». Ma di tezlit taneggarut, « Taravaille Dur Super Producer », yettmeslay-d ɣef uxeddim n tidet, ilaq amdan ad yefk leɛtab i terwiḥt-is. Ɣer taggara, ad d-nini belli ulamma s teglizit neɣ s ṣṣenf n Rap i yettɣenni Zidane Khaled, maca iswi-ines d asiweḍ n yidles amaziɣ s umata i umaḍal merra.
Gh. A