Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
Refden nnεac-nni ideg teẓẓel, ssersen-t deg yiwet tiγilt n wedrar, ṭṭfen-as taεessast, ttεassan-t s nnuba.
Ula d imezdaγ-nniḍen n teẓgi, am bururu, itbiren d wiyaḍ, bedden s idis-is, ttrun almi dayen kan fell-as.
Teẓẓel di nnεac-nni yersen γef tiγilt n wedrar acḥal, maca, ur terki ara yakk. Awezwaz mačči yexser di teglimt-is. Ad as-tiniḍ d taguni i teṭṭeṣ kan:
D tacebḥant am wedfel, a tazeggaγt am idammen,acebbub-is yettirriq am tebrek n ṭṭaq-nni iγef tbedd yemma-s, asmi tessaram ad tt-id-tesεu.
Yiwen wass deg wussan, almi d-yejba yiwen ugeldun, mmi-s ugellid, yeṭṭef-it webrid, dγa yekcem s axxam n iymuyuden, ira ad yesεeddi dinna iḍ-nni.
Iger tamamt i nnεac-nni di tiγilt n wedrar, yuli ad iẓer d acu yellan. Akken yewweḍ, iwala Nuja ideflawen yakkd d wayen yuran s isekkilen n wuraγ γef nnεac-nni:
D yelli-s ugellid ay tella ula d nettat.
Yenna-yasen i Yeymuyuden:
“Fket-iyi nnεac-agi d wayen yellan deg-s, ad awen-fkeγ ayen d awen-yehwan!”.
« Awwah » nnan-as, « azal-is ur t-id-yettawi ara yakk wayen tesεa yemma-s n ddunit d uraγ ».
yettkemmil