Netta daγen yerra-yas s reffu : Serreḥ-iyi ay aqadum n lmazirya ! (yewwet-as ifassen-is).
Nettat mazal-itt akken teckenṭeḍ deg-s, tugi ad as-tserreḥ. Tuγal tdewweṛ aqeṛṛuy-is γer Ṛuza, tenna-yas : I kemm tura, ad teqleḍ ansi i d-tekkiḍ neγ tebγiḍ ad kem-sḍiceγ ?
Ṛuza tessers kan i uqeṛṛuy-is, tugi ad as-d-terr awal, ma d Muḥend mazal-it ijebbed, Dasin tugi ad as-tserreḥ. Taswiεt kan teẓẓel afus-is γer teqfilt-nni n trisiti yellan di lḥiḍ, tebγa ad tt-tesref akken ad tnes llamba. Ṛuza mi twala-tt akken, yekcem-itt lxuf tebda tettḥellil deg-s :
I wumi yeεni i tebγiḍ ad yi-tesḍiceḍ ? Anaγ teẓṛiḍ argaz-a ḥemmleγ-t, d ayen i t-inefεen i as-buddeγ !
Nutenti akken ttemyuzzament Muḥend ur d-yerri s nba, ur yeẓṛi d acu i as-teqqaṛ tin wala tin, ibedd kan tewwet-it lwehma, iṛuḥ deg usekkiṛ. Ma d Dasin terra-yas lehduṛ i Ṛuza , tenna-yas: Ma d ayen i as-d-tewwiḍ, unfeγ-am sers-it-id da ad t-yeddem, meεna ḥṣu dakken argaz-a yesεa leqṛaṛ, madam dreγ ttwaliγ d nekk i d tameṭṭut-is, d lmuḥal ad t-ǧǧeγ ad yi-yebru neγ ad d-yernu fell-i takna. Mi d-tekfa awal, teẓẓel afus-is γer teqfilt-nni, tin tsuγ : Ala !
Dasin, yuγ-itt lḥal d ayen tesref tiqfilt yellan di lḥiḍ, tensa tafat, tεum talwit di txelwit amzun akken kra ur yeḍṛi. Imiren kan yuki-d Muḥend seg uṣṛa&epsilon,; am win i d-yekkren seg yiḍes. Yufa-d Dasin sdat-s, tger-as iγallen theddeṛ-as cwi cwi γer umeẓẓuγ-is : Ur ttagad a Muḥend, madam lliγ dreγ d lmuḥal ad ak-ǧǧeγ i umihi. Ḥemmleγ-k a Muḥend, atan εuhdeγ-k seg wass-a d tasawent ur qqileγ ad ak-ǧǧeγ iman-ik. D ayen maεac ad zzreγ ddaw n tmurt γas ad tefju lqaεa. Σuhdeγ-k ar d-zgeγ γer tama-k i labed llabed. Tεedda imiren tewwi-t γer wusu, terna ula d nettat tgen γer yidis-is, tebda tettcewwiq fell-as, tezzuzun-it am lṭufan akken ad yeṭṭes :
As-d, as-d ay iḍes
Γer uεziz-iw, ad yeṭṭes
Akken ad yaki tafejrit
Ad yexdem ccγel-ines
Asemt-d, asemt-d a tirga
Akken ad kent-yaru azekka
Agdud yuyes ad tent-iγer
Yettraju-tent s ccehwa.
Ifuk
*D tullist i yura Mokrane Chikhi, tewwi araz amezwaru di temzizelt n tsekla « Boujie d’or » n useggas 2010