Nnan ahu warrac uqbel ad d-yeffeɣ ɣer ssuq, Kiki-nni!!! Ad t-twalin, akken ma llan, warrac-nneɣ…Maci menwala ad iwenneɛ lxedma akken i tt-xeddmen iwaziwen n tririt n isura mucaɛen di ddunnit merra ɣer “tagi-nneɣ”. Wa s teqbaylit-is akken kan i tt-heddren medden; wa s tmusni-s am yemɣaren izemniyen; wa s ṣṣut-is ḥlaw, leqqaq, wessar, ḥercaw am tgerjumt-is; wa s yiles-is, iserreḥ neɣ yesqewqiw , awi-d kan ad tent-id yini akken t-rḥant, s teqbaylit. Si Pučči i d-bdan tikli, kkren-d meẓẓiyit lecɣal n taddart meqqrit! Maɛna seg wecrured ɣer tikli, kulci ad yis-sen yili! Tettuɣal-aɣ-d terwiḥt yal imi ara nsel s Kiki neɣ ayen icuban ɣur-s, yeflali-d, akka-d i Tizi. Yeflali-d cwiṭ seg waṭas n wayen i wumi zemren ad t-xedmen, cwiṭ-nni i d-iḥeggun aẓar n tutlayt di tmurt n leqbayel, di lɣerba n tyaẓit s aqwir neɣ di lɣerba n tmura n medden. Ayen akken yewwten ad yessenger At Temduct, ad asen-yekkes ayla-nnsen, yewwet ad yessenger leqbayel, ad ttun aẓar-nnsen, maɛna s tidak n Kiki At Uyefki, s yiles-is yessawalen taqbaylit s temlilit idelsan n leǧnas merra, ad d-tuɣal tudert s aẓar yemmuten lmut n tmara. Anda yella weqbayli, ad t-id-yuɣal wul ɣef tmurt, ad d-yemmekti Taqbaylit-is, ma dɣa yeǧǧa-tt, ad yemmel abrid n lewqam i warrac imecṭaḥ, imi tikwal d nutni i d at leɛqel, tiṭ-nnsen tettwali ayen akken tezgel tin imeqranen, d ayen akken tezgel i d leslak-nnsen! Amacahu ɣef tudert at temduct, tawacult n Lǧuher d Ǧiɛfer i d-yefkan Kiki at Uyefki, ɣef Da Cnupi, amɣar azemni iferrun tilla, yemmalen lewqam tikci t-iwala, ɣef Giɛfer yeskewkwen tudrin, ɣef ttar n wa d wihin, ɣef ibeḥriyen yattagaden ula d agu, ɣef tirga n warrac imecṭaḥ yettafgen am yefrax, s ilemsiren, imi ara mmḥemmalen Kiki d Ǧiǧi, ɣef Bucḥiḍ aḥeqqar yesnegren tudrin uqbel ad d-yas wass-is am netta am tewkilin-is, ɣef Tmusni n Ttuttu yemmalen abrid n leslak, ɣef yiccew n tẓekkuct i d-yettaken agerruj i wi t-yuklalen, ɣef Kiki nni, imi ara d-yeḥlelli, nettaded di tqacuct, nettqabal igenni, tignwat ma teṣfa, lɣella ad tili, ma tella twizi…
Zira