Liḥala n twennaḍt d tin i yettgerizen deg wass γer wayeḍ deg ubrid n uzaγar n temnaḍt n Wizgan, labeεda mi stenyant 08 tudrin n tγiwant n Wizgan yiwen n wulγu ass n 19 unbir 2011 anda i ssutren deg yimdanen ad ḥarben ɣef tezdeg n yiberdan d wurtiyen. D ulɣu ahat ara ijebden lwelha n waṭas n yimsebriden ur nettḍeggir ara ama d tiqreɛtin neɣ d iḍumman ara iḍurren tamurt.
Deg wulγu-agi, i d-fkant tudrin-agi i Uγmis n yimaziγen, yella-d usḥissef ɣef kra n temsal i yettḍurrun leɛwayed n tmurt n Leqbayel. D lḥerma s timmad-is i yettwaḥuzan. Degmi i d-gren tiɣri wid yettmeslayen s yisem n tudrin-a iwakken gen ẓẓerb i wayen ara iḍurren tamnaḍt-agi
Tikkelt-a ula d aselway n tγiwant n Wizgan, yedda-d d lmendad i yimḍebbren n tudrin-a, imi yessufeγ-d yiwen n wulγu ass n 06 dujembir 2011, anda yessuter deg yimezdaγ n Wizgan d yimsebriden iwakken ad qadren tiɣri-agi I d-yefɣen si tuddar mebla ma tewweḍ taluft ɣer yifassen n teɣdemt.
Islam Bessaci