Deg yitran icebbḥen iḍ aneggaru n useggas iɛeddan, ssikidaɣ rennuɣ almi i y-iban yiwen gar-asen d amxalef, icɛel, tuɣ tafat-is akken ilaq, yufrar-d am acemma, am zun akken iḥaz iman-is, yessikid deg wayen akken yebɣa deg tmurt tasusamt . Tamurt tsusem kan tettraju melmi ara yemlil wass d yiḍ, ad myeɛqalen akken i ddukulen, lamer ur yelli wa ur yettili wa nniḍen. Deg ubeḥri-nni aḥlawan, xas semmeḍ ciṭuḥ, ttemsawalen wulawen s uẓar, s uḥemmel, s uḥaruq yekkan gar wa d wihin, s rrezg i d-yezmumgen i ta d tihin, s sseɛd yesfilliten ad yefti deg wass ur necbi wid iɛeddan, ttemsawalent tsiswa n tid i wumi teqqed tasa ɣef wid tečča lɣerba n tmura, tisiswa n tyemmatin ur nerwi arraw-nnsent, rekben tiflukin yettawin ur d-ttarrant, tisiswa igujilen yettnuɣnin yal imi ara d-teḥder teswiɛt deg-i txellu tmurt i ten-yexlan, win ur njerreb tasa ad yens anida tensa ! Imeṭṭi n tasa d aḥninan, akken yettili d imeṭṭi n leḥzen i yettili d imeṭṭi n lferḥ d wayen yelhan. Tiwwura n useggas d asfillet i lxir, d asibnen n wussan, d asayes n wayen yelhan, i medden akken ma llan, akken i s-tenna Nna Terkiyya n Yillulen :
A tin i d-yesferḥen tasa-w
Rebbi ad kem-id-yessefreḥ
Taxriṭ-im ad tennerni
Ad am-yeg am wudem n ṣṣbeḥ
Ṭṭlam ur kem-id-yettwali
Ul-im dima ad yennecraḥ
Ad ken-yeg Rebbi am wudem n ṣṣbeḥ…
Zira