Tasebḥit n wass n 03 yennayer yezrin, yella-d unejmuε amezwaru n useggas-a amaynut 2012, n tesqamut n tiknik (Comité Technique) n dayra n Wizgan, γef uqerru-s aselway n dayra-agi mass Messaoud Boulares, anda iḥedren yiselwayen n tγiwanin n Wizgan, At ziki, Illoula umalu d ijer, akked yimḍebren n yiḥricen yemgaraden n Technique. Iswi n ugraw-agi d asenfar n unegmu yerzan 04 n tγiwanin n dayra n Wizgan.
S teγzi n 5 n tsaεtin, yella-d usqerdec n yisenfaren yemgaraden, wid yettujerden deg wahil n unegmu n tγiwant akked lwilaya n useggas-a yezrin 2011, am yiberdan, lgaz , aman, trisiti, tamezduγt, ixxamen n yilmeẓyen, inurar, atg. D tagnit anda iselwayen n tγiwanin fkan-d leḥsab s ttfaṣil γef yigemmaḍ n yisenfaren yettwaxedmen, wid yellan deg ubrid n lxedma akked wid yella akka di leɛḍil ilmend n kra n wuguren I d-mmugren.
Syen, fkan-d s wudem unṣib leḥsab n tedrimt yettuṣarfen i lfayda n tγiwanin n dayra n Wizgan akked tedrimt i d-yegran.
Di taggara, ṣsawḍen ufan-d iberdan n tifrat i wuguren yellan, dγa gezmen-tt di rray d akken isenfaren n unegmu i yesεan leεḍil ad bdun s wudem unṣib uqbel taggara n waggur-agi n yennayer.
Islam Bessaci