Tuγal-asen d tannumi i yimezdaγ n Tizi Wezzu. Mi bγan ad ssutren taγawsa γer yimḍebbren, ad γelqen abrid alamma usan-d γur-sen u ad asen-ṛeggmen tifrat deg ussan-nni kan i d-iteddun. Meεna wid yettxelliṣen deg wanect-a, d ixeddamen d yinelmaden n tudrin ur nettaweḍ γer luzin neγ γer yiγerbazen. Acḥal, dγa, n yinelmaden i izegglen ikayaden-nsen γef lğal unegzum n ubrid u ttxelliṣen-tt γlayet imi llan kra n yiselmaden ttagin ad fehmen taswiεt : ttqassan-ten.
Aṭas i yesteqqsayen i wacuγer alamma gezmen yimdanen abrid i d-ttilint tifrat i wuguren-nsen ? Llan wid iwalan dakken d wid iḥekkmen i yebγan akka. Ttexlaqen-d tiswiεin n leḥris akken ad sedhun imdanen neγ ad tt-sekkren gar-asen. ‘’Ad tt-id-xelqen nutni, ad tt-frun nutni. Dγa, nekkni ad asen-nini tanemmirt, am wakken d asuter i d-nessuter lḥeqq-nneγ. Nutni ad tt-ḥesben d lxir i aγ-xedmen ; d isellaken-nneγ.’’ Akka i iwala timsal Hamid. Ma d wiyaḍ qqaren-d dakken ’’ bezzaf akka, mačči kan win i d-yekkren sbeḥ yufa-d ruḥen waman dγa ad yeγleq abrid, akken yebγu yili d ixeddamen i yenṭarren mačči d imḍebbren.’’
Ddurt-agi iεeddan, d imezdaγ n tama-nni n Oued Aissi i iγelqen abrid aγelnaw 12 sin wussan kamel. Imdanen-agi iwumi qqaren ‘’Aεraben n wasif’’ ssuturen tinezduγin. Imdanen-agi γef wakken i d-nnan, yal wa ansi i d-yusa : kra si Tunes, kra s Lmaruk. Σlaḥsab n wid i ten-yesnen, tefka-asen dduwla ixxamen zik u senzen-ten. ‘’Akka tura amur ameqqran deg-sen sεan ṭunubilat, llan wid ikesben 4×4.’’ I aγ-d-yenna Malik.
Hocine. M