D isbayɛiyen wawalen yessidir deg usefru. Yecqarrew irebbiten n tayri s lbenna n tissit, yessutur tin iḥemmel di tizi n lebɣi, s kra yellan d leḥram, s kra yessibninen tisudan d wayen ɣef ttecruruden iḍudan-is. Tissit-is zeggaɣet tezwaɣ n wakal d idammen, yis-s i yettrejrij am wakken yettrejrij imi ara fuǧǧent wallen-is fell-as. Am rriḥa n ujeǧǧig n lyasmin, ttinigen akin i sebɛa igenwan, iteg-as amkan gar yitran. Rrezg n tissit imi ara d-mlilen, iɣimi deg yirebbi, ur tellzen ara, am rriḥa n ujeǧǧig n tifin i s-d-tessemɣay afriwen. D amdakel n usefru, mi t-id-yenna ad as-necfu… Di tregwa n tissit i tettili tudert-is, gar lqaɛa d igenni. Yid-s itettu wid-is, itettu iɛdawen n tudert, senninit tedmarin-is, tekksent-as lebɣi n tissit, itettu lkas i t-yeggunin ɣef ṣṣura-s ziḍen am tamment. Sew a tuzyint-is tamaziɣt, ini-d i kem-iqerḥen, s ifassen-is yeṭṭfen lkas akken ṭṭfen tidmarin-im, imeqqi-d lwerd am yiḍ am wass. S ifassen, s tcenfirin, tettɣafarem tisselbi. Tikwal xas ulac-ikem itess, yak lɣerba d ineẓman, i t-id-iṣaḥen ala ccfawat d yimru d lebɣi. “Yya ma ad tedduḍ a yelli-s n tegzirin ireqqen, iɛdawen lmusiqa bedden-d ɣef wemnar, yyan ɣer cceṭ, s axxam ibaḍniyen, wigi ur ḥemmlen tissit, ur ḥemmlen asefru”…….D mmi-s n tnariwin, d aseggad amaziɣ, ala kem a tawizet i d-yeččuren tiṭ. Tikwal ma yufa-t-id wass yettuɣal ansi i d-yekka. Cwi kan yettaru ayen yettidir, a tuzyint-is, tessidireḍ tirga-s, tsenniḍ deg imeslayen-is, am netta am medden, am kem ulac-as tayeḍnin. Ur ssaɣay tiftilin, tafat yettaf-itt ticki ulac-ikem, tinna akken ɣef yattaru, tessemɣay-as-d afriwen.
Zira