56 n yiseggasen aya segmi i tger irebbi Tewrirt n Musa i yiwen seg warraw-is i yessalin ccan n tmurt n Leqbayel, n lasel, n tugdut d yiseɣ. 13 n yiseggasen aya segmi akken, wagi yellan d asirem, yurag-d fell-as ubruri n rsas di Tala Bunan anda akken yessufeɣ ṛṛuḥ.
Lwennas yuɣ abrid n tẓuri, icennu am netta am wid i t-yezwaren ɣer waya, maca, tizlatin-nni-ines ur qqiment ara kan akka deg unnar n tẓuri, ufrarent akkin i wayen i zemrent ad t-walint wallen. Cna-s ur yelli d tafelsafit, maca d yiwen n uḥric anda izen yettas-d srid s amseflid. Matoub, yefren cna n umennuɣ ulamma isuma akka cwiṭ tayri, lɣerba, lḥif…
Ayen akk ijebden lwelha n uqbayli yal mi ara isel i tezlatin n Lwennas d awal aqbayli i d-yessukkus seg yimi n tatut. Yak, yenna deg yiwet n tezlit : « cerweɣ-t-id si zman aqdim .»
Yezga ixebbec deg yidles amaziɣ iwakken ad d-yessekfel agerruj-nni i d-ǧǧan yimezwura. Dɣa, d ayen i yernan sser di cna-s, imi yeqqen ɣer wayen i d-nnan yimusnawen n tsekla.
Acḥal n yimdanen yesnen kan Matoub s tezlatin-is nwan dakken d agujil, neɣ llan wid yeqqaren belli baba-s d win yemmuten deg unnar n ṭṭrad, imi ddeqs n tezlatin i d-yebder aya. D ta i d tazmert n unaẓur yettarran iman-is deg umḍiq n win yenṭerren.
Taluft tamenzut i yeqsen Lwennas d tin yerzan tanekra n yinelmaden n tesdawit n Tizi ass n di yebrir 1980. Yesḥassef, imi ayen i yeḍran i yisdawiyen d yaen ur iqebbel leɛqel. yenna :
Di rebɛa uɛecrin yid-sen
Begsen-d, wwin-ten
Mi tzehher tmes di Tizi
Ttun sɛan atmaten
Ad ten-id-yessufɣen
Myefken lɛahd irkelli.
D tiqit i ifegḍen abuqal ! Agrawliw, akken i as-ssawalen medden, iberru-d yal tikkelt i tidet, yegguma ad yeqbel azaglu ad d-yers ɣef yiri-s. d ameddaḥ ur netteḍḥi, ur yettaggad ur yettkukru, awal-is ɣef tmaziɣt, iswi-s d tamaziɣt. Lasel-is yugi ad yefk deg-s afus, yeggul ad yeddu alamma yesdehr-d tidet. Dɣa yenna ɣef waya :
Ad nerrez wala ad neknu
Bbin deɛwessu
Mi ḍefren azrem ɣer lɣar
Skud nedder tiṭ ad tewɛu
Neɛya deg uraju
Ass-a, grent-d tseqqar
Awal iɣef smaren rekku
S tirrugza ad d-yeḥyu
Anta d tjra ur nesɛi aẓar ?
Tikli-s d umennuɣ n yal ass ɣef yizerfan n yiqbayliyen ixelles-it s leɣla, imi di tnekra n Tuber 1988, Lwennas ters deg-s tyita qerriḥet. Deg ubrid-is ɣer Micli anda yewwi kra n tewriqin i yellan d ulɣu i lehna, uragent fell-ad xemsa terṣaṣin s ufus n yiǧadarmiyen. Degmi i d-yenna :
Xelseɣ adrar s yidammen-iw
Ad d-yeqqim later-iw
Ɣas ggullen ar d ad t-sefḍen
Wid yettganin di lmut-iw
Yessamsen isem-iw
Kul tizi ad iyi-d-mlilen.
Taḥeccaḍt n ubrid teǧǧa deg-s ccama ur nmeḥḥu, imi mačči drus i yeḍran yid-s. Maca, taflest i yesɛa deg watmaten-is n umennuɣ tessaxfef fell-as taɛkemt.
Abeddel i d-yeḍran di tmurt ur yeǧǧi Matoub ad yuɣal di rrif, yezga-d d amezwaru di tmesbaniyin. Yezga yessawal ɣer tdukli imi yenna-d deg yiwet n tezlit :
Ma nnan-ak d acu i d tafat
Ini-asen d iɣallen yeddukklen
D tallit dɣa i iweɛren aṭas ɣef Lwennas imi di tizwar yella yettnaɣ kan mgal adabu ikeblen tameslayt. Yuɣal yennulfa-d uxṣim nniḍen : Imesḥaf, akken i asen-isemma. Iteddu, yettweṣṣi imi yeḥṣa ayen iɣer d-kkren d ayen ara iḍurren taqbaylit. Yenna fell-asen :
Ɣef ugerrun-nwen ḍallen
Leḥkem ad t-ṭṭfen
Lqebla ar d as-neknu
Ajgu n uẓref ad t-ɣeḍlen
Win ara ten-ixalfen
Ad as-ssifgen aqerru
Ihi, am wakken i tt-yenna, tenxarwaḍ tmurt, yers-d ṭṭlam deg uzal. Ɣellint tmegraḍ, ttruḥun yirgazen d iseflan, wa deffir wa. Tamettant n Tahar Djaout tessenhez tasa n Lwennas, i iwalan ussan i d-iteddun ad ibriken. Yessekles yiwet n tseftit anda yerra tajmilt i uneɣmas amenzu yeɣlin d asfel, deg-s yemmeslay i yelli-s tameẓyant, Kenza, mi as-yenna :
Iceqqeq ifesx igenni
Lehwa tessared aẓekka
Yal targa tremmeg tneggi
Tteggixent tɣezza
Ddaw n tmedlin teffeɣ-d teɣri
Tesrareḥ a bbuh a tarwa
Aseggas mbeɛd lmut n Djaout, d Lwennas i yettwacleqfen, iɣab azal n 17 n wussan. Wwin-t yirebraben ! tamurt n leqbayel tebges, ggullen ur teǧǧin ad yeɣli. yenna :
Ulac win ur d-nesteqsa
Ulac win ur k-nqelleb
S yifassen kkren i tẓegwa
ɛebblen, begsen i leɛǧeb
s nitni i d-tuɣaleḍ ass-a
rran-d tudert i lɛemr-iw
Matoub, iwala acu i teswa tegmat, yesḥassef aṭas s uqejjem yellan gar leqbayel n at ufella d wid n at wadda. Ulamma yefreḥ s tugdut, s tlilit n yikabaren, maca ur yeqbil ad ttemyegzaren watmaten-is. Degmi i d-yenna :
Imeslayen-nni n umeddakkel Lhachimi
D Dda L’Hocine neɣ Sadi
Yettakken abeḥri i turet
Akka i iwala Lwennas tufɣa si ṭṭlam ɣer tafat. Tennerna tmusni deg-s mačči d kra.
Ayen i yeswehmen imdanen dakken aṭas n wayen i d-yenna, yeḍra. Aya, ad tnaf deg yiwet n tezlit mi d-yenna :
Ass-agi lliɣ
Azekka wissen
Nniɣ-d ayen i zriɣ
D wayen i ttwaliɣ
Cfut di terga ma ɣliɣ
D anza-w ara wen-d-yessiwlen
S tidet akka i tella, imi wid i t-yenɣan, ẓlen-t di terga. Daɣ, deg yiwen n usefru, yura-t, ur t-yecni ara, yenna deg-s :
Tarwiḥt att-a ɣef ssebba
Ur gganeɣ ara
Ttewḥiceɣ ad d-yeḥḍer yiḍes
Tezdeɣ-iyi lmut tirga
Nnehtat, tawla
Aberḍi-w a d-iteqqes
Tikkelt-a ad tesɛeb tnekra
Unfeɣ i lmeḥna
Tudert ad tt-id-tesseɣres.
Ayen i yecna Lwennas mačči d yaen i nezmer ad t-id-nebder di kra n yisebtar, imi d agerruj i d-yeǧǧa deffir-s. Tajmilt i iwulmen ad as-tt-nerr d akemmel deg ubrid yenjer ara t-yeǧǧen ad yers di talwit.
S. M