“Ssneɣ Cerif Xeddam di 1971, deg yiwen n lweqt deg-i ssneɣ dda Lmulud Mɛemmeri. Asmi neqqar ɣur-s, nettawi-d Cerif Xeddam akken ad aɣ-d-yecnu, nettruḥu nettmerriḥ, s warrac n tesdawit, dda Lmulud ak d Cerif Xeddam, daɣen inaẓuren nniḍen, nettruḥu ɣer tala n yilef, ɣer Tigejda, ɣer Tegzirt. Zemreɣ ad am-d-iniɣ tuɣac n Cerif Xeddam ssulint-d idles-nneɣ lawan-nni, xaṭer nekni imiren meẓẓiyit ur nesɛi ara wigad i ɣef ara ntekki, ɣer ara nmuqel, yettemma tuɣac-is ssulint-d deg yidles-nneɣ, deg imi sent-nettḥessis, lmuziga-ines wala imeslayen-ines xaṭer imi ara tmuqleḍ acu ak i ɣef d-yemmeslay ama d tayri, ama ɣef tmetti, ama ɣef tsertit ama ɣef yeɣriben, yettusemma tamuɣli-ines d tamuɣli n umusnaw n temtti, n umusnaw n tnefsit, n umusnaw n wemdan, n umusnaw n tsertit, nekni imi akken ara d-yecnu, nettḥussu am wakken tettergigi tasa, imeslayen, taɣect-is d tinna i d-aɣ-yezzuznen asmi meẓẓiyit, ayen i si ferḥaɣ aṭas di ddunit-iw, skecmaɣ tuɣac n Cerif Xeddam am wakken skecmaɣ Si Muḥ Umḥend , Ait Mengellat d Slimane Ɛazem ɣer tesdawit n Fransa. Ulac lǧens ur neɣri ara imeslayen-is, ur nesli ara i taɣect-is, ak wigad yeqqaren ɣur-i, inelmaden, xaṭer aṭas i iɣillen taqbaylit-agi d leqbayel kan i tt-yeqqaren neɣ d Imaziɣen n Lmarruk neɣ d Imaziɣen n Tmazɣa, ttasen-d ɣer ɣur-i Iṭerkiyen, Irusiyen, inelmaden n Marikan n wadda, Ilalmanen, diɣ netta Cerif Xeddam ijebbed-d iẓuran n Tmazɣa, n Teqbaylit uma d aɣen yettwali ɣer zdat. Yecna-d ɣef tmuɣli, deg umedya “Nadya a tumliḥt n tiṭ..” taɣect-agi zemraɣ ad am-d-iniɣ qqimeɣ fell-as setta waguren akken ad hedraɣ fell-as d inelmaden , xaṭer tamuɣli imi ara yettmuqul bnadem wayeḍ, yettusemma ad d-yesken ayen yellan deg-s, acu yellan deg udem-is, acu yellan di ṣṣura-s, tamuɣli tzemreḍ ad tettmuquleḍ s wayen ilhan, ad tmuqleḍ s leḥnana, s yir tamuɣli, ihi tamuɣli n Dda Cerif d tamuɣli yettaken leqder n wid yettwali. Maci akken ttwalin Irumyen, irusiyen neɣ ilalmanen ara nwali nekni, kul tamurt tesɛa tamuɣli-ines ɣef lɛebd, imi ara d-yecnu “Nadya a tumliḥt n tiṭ” d tamuɣli n uḥemmel, n wid i k-yellan deg wul, n leqder, yessawal i tin iḥemmel s liser, d tagi i d tamuɣli n dda Cerif”
Hacen HIRECHE, amusnaw n umezruy,
Aselmad di tesdawit n ParisVIII