Yendef wawal, yeqqed armi d adif . Yennuɣni uḥiḥa armi tejreḥ taɣect. Yuli-d ɣef wul wadal n leḥzen. Tidet tcebbeḥ-d s lekfen, tbed–d ɣef umnar akken ad tezzu deg yixfawen n yimdanen. Times, yeṭṭfen deg uẓemẓum uḥḍim, yelheb ujajiḥ-is akken ad yesseknef s tirgin n lɣiḍ ulawen yezzan deg wakken gtent tiyitwin i d-yemmaren fell-as. Yir asali yuzzel deg yimawen. Di ccaw, teḥnunef tmuɣli, udren lecfur, lḥir akked lwehmat jerḍen udmawen. Tcelleḥ tasa s teqriḥt i d- ileḥqen. Di tmurt wa yeqqar i wa : yunag win akken i nettɛuzzu.
Ǧerǧer yerra ɣer daxel ineẓman, yezdi lqedd am wakken i t- yezdi mmi-s yettɛeddayen s ttnefxa s ddaw leɛnaya-s. Bgayet, akkin, tessusem imeṭṭawen , akken ad tuǧwed ṛuḥ i Leqbayel ansi ur d- yettwaǧǧew. Ijelluba n tmurt ddurin anuɣni akken ad rren lɛez i win i as- igan lɛez. Werǧin s nneqma yuli-d ccna seg yixef n yixfawen-nneɣ, mseḍfarent tezlatin, ṭṭfent nmara i tmettant, din tendel rrehba-s. Di tmurt wa yeqqar i wa : yunag win akken i nettɛuzzu.
Deg unnar n tẓuri, tessa takka n usḥissef tirni. Idim mi yettlaɛin idim yeṭṭef di tzumna tin ireṣṣan ṣṣwab di leɛqel. Ɣer kamel Ḥamadi Crif Xeddam d anaẓur amabal (eternel), ɣer Lunis Ait Mengguellet, yettwaqden deg yixef-is, irgazen am Crif Xeddam ur ttmettaten ara, ɣer Akli Yaḥyaten Crif Xeddam d argaz n yiseɣ, ɣer BenMoḥamed Ccrif Xeddam yesselmed-aɣ anamek n thuski, ɣer Ferḥat Crif Xeddam d ababat n ccna atrar aqbayli, ɣer Belɛid At Meẓian n radyu idurar yefsi udrar n syir asali i d-ileḥqen. Di tmurt inaẓuren run bab n tẓuri win akken i yunagen fell-aɣ.
Akkin, tizlatin bernent am umeqyas, tezzin di tignaw, cennunt s yiwet n taɣect : tirga n ufennan, nadiya a tumliḥt n ṭit, s yisem-im a Jurjura, acḥal d abrid i yesliɣ, lukan mazal ttɣeniɣ, a lemri, teččur d lfen,yedda-d slam-im, zzin d lfen,ḥesbeɣ iman-iw d aggur, nesɛa lḥeq ad kem-nḥemmel… din yeddukkel ṣḍa n ccna, yeḥluli deg yimeṭṭi, yuzzel ɣef wakal akken ad yessew aẓar n tejra n leḥlu imi urǧin yuyes d akken aseklu n leḥlu duleqrar ad yeǧǧ ixulaf. Di facebook, lfahmin rran tajmilit i win yeswan s tidi n lmux-is aẓar n lfen anaṣli, i win yezdin ixfawen-nneɣ ɣer tjaddit-nneɣ. Di tmurt wa yeqqar i wa : ziɣ yunag win akken i nettɛuzu.
Ur yeɛyi yiles di lehḍur, xas ma llan iɛezzugen, acku akken i as- yenna umedyaz : awal mi d-yeṭṭerdeq ljil i t-yebɣan yufa-t. Crif Xeddam, xas ma yunag, lfen-is d anagi ɣef tudert–is yeččuren d asnulfu. Tudert yuzlen di terga n lawan d aḥiha yeswan tiɣuza n wulawen-nneɣ s thuski, s tayri, s talsa, akked usirem. Di tmurt nbeqqa-as slam i unaẓur, s yisefra( widen-nni i iḥemmel), nessa fell-as leḥmala (tin akken yecna), nura tanfust-is (tin akken yebna) s leqlam n tayri ur nfennu !
Ait Slimane Hamid