Tisuqas-is am tebratin n ubeḥri asemmaḍ n tmurt n leqbayel yessaɣayen am wegris deg ṣṣura-nneɣ, deg wulawen-nneɣ i d-ɣufrent tnessufin n bessif. Cfiɣ ccfawat n temẓi ɣef izeblac-ines irennun di sser i lqermud aqdim sserwawcen ifassen n at tmurt. Izeblac reqqen am waman seg wakken neggin d sser. Abernus-is amellal d acewwiq n liser i liḥala n tmurt, di tizi n wass-a; D afus ayeffus yettnadi ugellil, yettnadi umneṭri, yettnadi umerkanti izedlen deg uxxam azdal n tmara; D tawwurt s wallen imi d iberdan ɣelqen ɣer Ǧerǧer, ɣer Ukeffadu neɣ ɣer Tgejda. Ala yekkat itezzi, yesmaray, yessaɣay, gar lqaɛa d igenni, am ccnawi n lḥif umessedrar n twaɣit ur yekfi ucacbaq n uyefki i s-id-tɣat taɣaṭ-is, neɣ tqerɛet n lgaz i t-id-iṣaḥen d amur seg wayen i d-yefka wakal-is. La yekkat itezzi, akken tezzin iseggasen, gellun s temẓi, gellun s ilemẓi yesserɣayen iman-is akken ad fsin ideflawen n uzaglu i t-yeggunin di tmurt-is; La ikkat itezzi ismaday icerrigen ugar n tfawtin, di tlaba-nneɣ n leḥrir amellal imenna wul d iseggasen-aya tura. Nɛemmed neɣ nettekka! I tebɣuḍ taɛlayeḍ, d ulaqrar ad k-id-yecqarrew, wedfel-nni, ay adrar-iw…Yekkat ur s-tettakiḍ, yesmaday ur d-tecqiḍ, teqqareḍ-as kan anef ad terwu tiṭ ayen akken i tectaq, anef-as ad tellez, yak d wa i d liser n igenni! Liser n igenni iban , i win n lqaɛa amek i d ixef-is? Sliiiiiiiɣ i ṣṣut yeffel-d ak-ad i Tizi n Wedfel, d tiɣri, d ineẓman n wid yettu zzman, ttnadin tawwurt deg tiwwura n igenwan. Aḥebber n useggas, azdam n kul ass, ur qdiɛen ara. Tiyita n tikelt-a ad as-necfu, ad d-tessekfel kra din d leɛyub i neṣṣer iḍelli. Yiwen wass, ad as-necfu, iɛedda-d, yegla-d, yegla, yeǧǧa-d, yeḍsa-d, yessefraḥ, yesseqreḥ. Yewweḍ-d wass deg-i ara nerr aḍar, ad aɣ-yeṣṣer wedrar-nneɣ, ma neṣṣert-it, ma neṣṣer iman-nneɣ!
Zira