Tawilayt n Tubiret tettidir yiwet n teswiɛt qessiḥen seg udfel i d-yeɣlin s ṭṭaqa di ɛecra wussan aya yezrin. Yessufeɣ leɛqel i yimdanen ur nedmi ara akka ara taweḍ liḥala. Tuget n yiberdan reglen deg wussan imezwura uqbel ad awḍent tmacanin ara d-yessuksen imezdaɣ n tamiwin yemxallafen seg lḥif ideg llan. Ɣas akken srabes n usellek s wudmawen-is imeṛṛa llan di lmendad i yimdanen, maca ayen i d-yeɣlin n udfel tikkelt-a d ayen ur ẓrin ara medden acḥal d iseggasen aya. Aṭas n tudrin i yeqqimen ttwaɛezlent, imi asiweḍ ɣur-sent mačči d ayen i isahlen. Di kra n yimukan, ad d-yili userreḥ n ubrid tasebḥit, kra n tsaɛtin mbeɛd ad yuɣal akken yella. Deg yiwet lmerta tameqrant i ttidirent temnaḍin i d-yezgan di tɣaltin, imi nnig tluft n yiberdan ireglen terna-d tin n lixsas n lgaz. Dɣa d aɣbel ameqran i ttmagaren yimdanen deg wussan-a n usemmiḍ.
Ccerfa d tamnaḍt anda i tella tkebbanit yesnuzuyen lgaz. Segmi akka yella udfel, yeddem-itt zhir d udemmer zdat n tewwurt, imi d imeyyaten n yimdanen i tt-iqesden di tafrara iwakken ad d-awin taqerɛet neɣ snat n lgaz. Yuɣal ubrid aɣelnaw wis 26 d lmibriḥ anda tikeryas d yikamyunen msennaden wa deffir wa almi sweɛren tikli d uɛeddi n yimsebriden.
Di Beclul neɣ di tubiret, anda yettnuzu yakan lgaz, araǧu ur yesɛi tilisa. Ttwaɣen medden yettganin tisin n yikamyunen n Naftal ahat ad ten-id-isaḥ lgaz. Lḥasun taswiɛt mačči d tin yessefraḥen. Adfel, mačči kan yesxas lgaz neɣ ayefki, maca yemdel tiwwura n yiɣerbazen.
Azal n sḍis wussan i qqimen yinelmaden deg yixxamen-nsen, imi iberdan yettawin ɣer lakulat reglen. Ula d wid yellan di kra n yimeḍqan n luḍa medlen tiwwura imi smenyafen yinemhalen rray-agi wala ad uraren s tudert n yigerdan. D acu kan, yezmer ad yili deg yimuras i d-iteddun yiwen wahil n uɣram n wayen akka yeqqimen igellel deg wahil.
S. M