Yal aseggas, deg wass n umenzu n tefsut nesfillit i lxir, am wat zik, yettarran kullec d rrebbaḥ, xas iɣusa iceqqeq, ḥedru-d ad yuɣal d iceqfan! A nili kan am nutni, xas taluft iɛeddan ur d-aɣ-tcuḥ, texleq-d deg-naɣ leɛyub i yettrajun lexxar! Tessefrurex deɛwessu tegguma ad aɣ-tebru, “yal tikelt wi d-aɣ-yerẓan», ulay d-xedment tejbirin. Amer ahat tafsut-agi a tt-nleqqem s wayen imeɛnen imi aṭas n lxir i d-yewwḍen s amnar: Meɣres d tameɣra n wulawen, d acewwiq n tin i d-yettaken afud i Yidir, yal imi ara t-yewwet wugur n ṭṭlam. Meɣres d ussan di tmurt s wayen i d-yeǧǧa iḍelli ɣef mmi-s n igellil ur nesɛa amur di tmurt n wakal d idammen, yuran Tilelli, deg Iberdan yessawnen. Meɣres d amennuɣ imedyazen deg wedrar n Fad, d acqirrew-nnsen s wawal n ixulaf itekksen fad di tegrawliwin n yiles. Meɣres d awal ɣef Tmaziɣt yewwin acḥal d asfel, yessazlen acḥal d lǧil, acḥal d tasuta, d awal di tesdawiyin n Tizi d Tubiret, xas akka Tubiret nessendaf lejruḥ-is yal tikelt imi ara s-nekkes amur-is n yedles amaziɣ, i d-ḥellan ineɣmasen, wid-nni yettamnen belli nezmer a nessengar Bururu uqbel ad aɣ-yessengar! Ad feggdent tliwa s tfaska n isura s tmaziɣt ara d-yilin deg waṭas n tamiwin n Tizi Wezzu, ad awint rriḥa umennuɣ s tteṣwira akken I s-d-nejrent abrid tmital N Meddur d Bugermuḥ ara iḥedren gar-aneɣ di Meɣres n Tizi Wezzu. Ad neɛreḍ a nesmed cwiṭ-nni uzeɣbub usirem i nettawi deg wul, a nmager tafsut akken ilaq. Meɣres n useggas-a d Tiwizi n yedles d ccfawat d umezruy di Tmurt yewwin ak lexyuḍ n rruḥ i si nettidir di Tizi n wass-a, Tamurt n Muḥend Saɛid At Mlikec ara yegren Irebbi i yat tmusni, i inaẓuren, i yat yedles, i yat lḥirfat n ufus, i imedyazen, i wid ak yessidiren tikta, di Bgayet. Meɣres d Tamurt ur nelli ma ulac wid i ineddhen s yisem-is, ay arrac n ideflawen!
Zira