Akken bγunt nnernint tmusniwin, akenn bγunt gtent tezrawin di tmetti, mazal werεad yefhim umdan iman-is akken ilaq. Mazal ttwaεelqen kra n yisteqsiyen ur asen-d-yufi tiririt, ladγa wid-nni icudden tudert γer lmut. Amek yezmer umdan ad yeḥkem γef yiman-is s lmut ? Netta seg wassmi ara d-yekker d amdegger di ddunit γef tudert. Xas tikwal tettili-d am wacemma sebba γef wacu yenγa iman-is, meεna, ahat, s ufella kan i d-terna : yella wayen yellan, yakan, deffir wayen. Ayen yeḍran ddurt-a di tamma-nni n Buzeggan, nezmer ad d-nini yemgarad ciṭ γef sebbat i ittağğan imdanen ad nγen iman-nsen. Ha-tt-an sebba, γef wakken d-nnan, i yeğğan amdan-a ad ineγ iman-is : ihi, argaz-a inehher s nnuba netta d yiwen-nniḍen akamyun n yiḍumman n tγiwant. Ass-nni d nnuba-s n lxedma meεna yeγli-as-d cγel, dγa yenna-as i umeddakel-is ad yeṭṭef amekkan-is, meḥsub ad yenher akamyun-nni. Ameddakel-nni ines teḍra-as-d twaγit : yegrareb s ukamyun, yenṭer. Yekka kan kra n wussan di sbiṭer, yewweḍ leεfu n Rebbi. Akken yesla urgaz s yir lexbar-a, yekker iεelleq iman-is. Yugi ‘’ad isemmeḥ’’ i yiman-is. Am wakken d netta i d sebba n tmettant n umeddakel-is.
Hocine.M