Ilmend n usmekti n umulli wis 32 n Tefsut Imaziγen, imeγnasen n tmaziγt deg Libya gren-d tiγri i yimezdaγ ladγa wid n temnaḍin timazγawalin akken ad ggen tikliwin i wass n 20 yebrir 2012 ideg ara sutren tugdut d usteεṛef s tmaziγt. Tiγri-ya γef wakken i tt-id-ineqqel uγmis alikṭruni ossanlibya.org, uran deg-s: » Ass n lǧemεa 20 yebrir 2012 d ass yesεan azal deg umezruy-nne&gamma,; d ass n Tefsut n yimaziγen n Libya, ad neffeγ akk di tikliwin am umeẓyan am umeqqṛan di yakk timnaḍin n tmurt, ama di Ṭṛablus neγ Benγazi, Sebha, Mesṛata, Neffusa…Di yal tamnaḍt n tmurt n Libya i wakken ad nini: Tugdut di Libya, asenṣeb n tmaziγt imir-a mačči azekka, ala i uεeṛṛeb asertan, ala i ulaqeb n Tmazγa s yisem; Lmeγreb Aεṛab Ameqqṛan, ala i uεeṛṛeb s yisem n ddin ». Mebla ccek Tafsut Imaziγen n useggas-a ad tili d tagnit i yineγmasen n tmaziγt ilibiyen akken ad qedcen εinani mebla tugdi, mačči am yiseggasen yezrin ideg tt-icud fell-asen Mεemmeṛ Lqeddafi d yiγallen n leḥkem-is.
M.C