Ifuk ucayaḍ d wuzzu n tasa, d lawan ad nebges ad as-nbeddel udem i tefsut mafaɣ a nettmettat kan ɣef wayen ara ɣ-yeččen! Ad as-nessibnen tamuɣli, ad asen-nessibnen i “Usssan di Tmurt», ad as-nbeddel Tikli, ur nettaḍen aɣbel i wid yettnuzen s rrxa, ur nettili d iseflan s yidim, s ṣṣura, s tmes yettaɣen deg-naɣ yal imi ara nečč times ɣef wayen i ɣ-yeskawen ifadden, neɣ s temgarṭ ɣef itettel wemrar n trewla n warrac-nneɣ si llakul n Lezzayer iḥfan. Si Bgayet ɣer Tizi, si Tubiret ɣer Iheggaren, si Tasili ɣer Libya, tafsut n tikelt-a d iɣallen yedduklen, ad d-nerr rruḥ i ɣ-iteffɣen yal tikelt imi ara d-yezzi beryel: Tamusni, Tira, Idles, yis-sen ara nessiked ɣer zadt anda akken i ɣ-d-imuger umennuɣ. Ur nettaǧǧa ad iɛeddi fall-aɣ uzaylal am wakka la yettɛedday ɣef twacult Ɛemruc, deg yiɣil Ɛli, ur nettaǧǧa afus n tizzelgi ad aɣ-yessexreb tirga, d tidet telha tsertit maɛna ma tewwi-d lewqam i imesdurar n twaɣit. Tafsut-nneɣ aseggas-a, d tira n yidlisen, d tira di facebook deg-i nḍebbeɛ taktiwin-nneɣ , rray-nneɣ, xas tikwal rray ulac, deg-s i nḍebbeɛ tudert-nneɣ, idles-nneɣ, tamusni-nneɣ, isefra-nneɣ ara ɣ-d-yessuksen si nnger! Tafsut-nneɣ n tikelt-a d acewwiq n umennuɣ di tizi n wass-a. Tafsut-a, tabuḥcict n teqbaylit ad tessiwel: “ A Dadda lwali, d abrid ad nɛeddi…….!
Zira