Ad as-yini ḥedd msawalen, almi mseḍfaren wa deffir wa, ǧǧan-aɣ-d ilem, winna akken ur neččur asmi akken llan gar-aneɣ. Di tlata d inaẓuren, d at n usefru, d at wawal, d at tẓuri. Fnan leɛmer-nnsen ɣef tẓuri d rradyu n teqbaylit isetten deg warraw-is trennu, ur tessin ad ten-id-temmekti akken tt-uklalen, d imuduren, alma teḥwes-iten tmettant d ayen , sakin xas rfed Leqlam ad taruḍ! Deg wesmekti n tefsut n tmanyin, di ɛecrin di yebrir i nemḍel winna yesswalen tiɣri n “Jeddi», winna yettawin acmumeḥ d wezmumeg d aɛwin kra tekka tudert-is. Yedder tudert n lmalayek tiḥninin yesfilliten i lxir d lewqam, yewwi taẓuri d aɛwin, almi d i t-iffeɣ rruḥ. Ixdem-itt seg ul: d isefra, d ccna, d amezgun n rradyu, d ssinima…artg.Yesdukel-itent merra. D anaẓur d wawal! Xaḍen-aɣ imawen, rran-aɣ tikmamin mafaɣ ad d-nini tiqerḥanin, tid-nni yessergagayen ibuxuṣen yal imi ara d-ḥedren tnekriwin n yebrir. Xaḍen-aɣ imawen, gezmen-aɣ ilsawen yezzuzuren tisuqas deg yimi n yal aqbayli akken ad yefriwes, ad yeknef, ad d-yemmekti anda yedda laṣel-ines. Di talwit a dda Mhenni Amrun, nekni ad as-yini ḥedd s anwa i d-aɣ-tt-yedɛan, yugi ad aɣ-yebru ddel, tugi ad aɣ-tebru tatut. Amer d lebɣi ulac win d-teǧǧa tɣaladt, xas rran-aɣ tabladt, jedd-nneɣ ad t-id-nessedhar…Mazal tifeswin xas yal ta d udem i s-fkan, ta tefsa, ta tenna, ta telsa, ta tedda, imerra yiwen webrid ara aɣent, d abrid n tlelli, n tmussni, n tẓuri. Ḥedru-d ass n tlelli n umeslay, amer ahat ass-nni ad d-nini, akken ad nidir, ḥedru-d tilibizyu s teqbaylit, ḥedru-d aɣmis s tmaziɣt, ma nesdukel iɣallen-nneɣ, ḥedru-d “L’académie” nni n tmaziɣt nettraju am weqcic n ccuq, ma nebges, ad nessayes amur-nneɣ skud akka mazal ifadden, xas wa ijebbed, wa ikerref. Ass-nni ad ǧǧuǧgent tfeswin, ad ffɣent tirga n Yidir.
Zira