Ass n 12 d 13 deg waggur n maggu ideg nella, tuγal-as tejmilt i Σemmi Ssaεid Debyan deg Uxxam n Yidles Lmulud at Mεemmeṛ n Tizi Wezzu. Σemmi Ssaεid i wid ur t-nessin ara, d yiwen n umedyaz n teqbaylit yewḍen leεfu n Ṛebbi ass n 29 cutember 2011, seg yimir yeǧǧa-d leḥzen d ameqṛan deg twacult n yimedyazen n tmurt n Leqbayel i yezgan ttmaktayen-d imeslayen-is yeččuṛen d lmeεna akked nnecṛaḥa. Ilul Σemmi Ssaεid (Said Debiane) ass n 16 maggu 1944 deg Laṛebεa nat Yiraten, seg asmi yella d ameẓyan, netta yerra ddehn-is γer yidles d tsekla, ayen i t-yeǧǧan yessen aṭas n lemtul d leṣnaf-nniḍen n tsekla timawit yecban tamedyazt d tmucuha. Σemmi Ssaεid, nnig n tmedyazt i ixeddem, yeqdec deg uḥric n umezgun akked ssinima. Yezga yettṛuḥ γer tfaskiwin n tmedyazt i d-yettilin yal aseggas ama deg Uqbu neγ At Smaεil akked tin n wat Jennad, din, i t-ssnen waṭas n yimedyazen ilmeẓyen i t-iḥemlen s waṭas ilmend n tmussni-is yerna iḥemmel ad yennecṛaḥ. Di tejmilt-a i as-terra tenmehla n yidles n Tizi Wezzu, tella-d deg-s temzikent n ttṣaweṛ n umedyaz d yimagraden n tγamsa ideg d-mmeslayen fell-as. Timzikent-a yettekki daγen deg-s mmi-s mass Ali Debiane s ufsar n tfelwiyin n teklut i yexdem s yifassen-is imi netta daγen d anaẓuṛ am baba-s. Am wakken daγen i d-tella tγuṛi n yisefra deg tzeqqa tameẓyant n uxxam n yidles s-γur imedyazen i d-yerzan γer tejmilt-a yecban: Ahmed Khettabi, Mohamed Aouchiche d Abderezak Farez. Deg wass wis sin n tejmilt, imdukal n umedyaz d wid i t-yessnen, rzan γer taddart-is Mazouza anda i yemḍel, sersen γef uẓekka-s tamuqint n yijeǧǧigen.
Mokrane Chikhi