Rreḥba tis 8 n udlis d ugtelɣu amaziɣ i d-yellan di Tibiret seg 19 almi d 22 seg waggur ideg i nella temdel tiwwura-s tameddit n wass s uḥḍar n yimḍebbren n Usqamu Unnig n Timmuzɣa, lwali n Tubiret, amaray amatu n twilayt-a, anemhal n yidles, anemhal n usegmi d waṭas n yimḍebbren d yinebgawen.
D tarbaɛt n yimẓabiyen i yeldin amraḥ s kra n ccna d yicewwiqen i d-yekkan seg yidles-nsen, zzuznen yes-s s kra n wid yellan di tzeqqa n uxxam n yidles Ali Zamoum. Akken kan i tessuli terbaɛt-a, d Ali Bouguerra akked Youcef Meraḥi i yulin ɣer usebdad iwakken ad rren tajmilt i yiwen n umezdaɣ n Tubiret yettwasnen d amejjay n wallen daɣ d aneɣlaf aqdim n lumur n ddin. Wagi d Said Chibane. S asawaḍ n Zira d Muḥemmed, yenna-d : « ass-a, yesmekta-id aseggas n 1945 mi lliɣ d anelmad di tesnawit n Amara Rachid di tmaneɣt asmi i d-yecna Yidir Ait Amrane, ad fell-as yeɛfu Rebbi « kker a mmi-s umaziɣ ! ». D tagnit i ifures uneɣlaf Chibane iwakken ad d-yesmekti abrid i tuɣ taluft-a n tmaziɣt di lawan-nni n lḥers. S yen, d yiwen n umaru n temnaḍt n Sour El-Ghozlane iwumi tuɣal tejmilt ɣef wayen yura d idlisen. Wagi, d Kaddour Msemhadji i d-yennan : « ur zmireɣ ad afeɣ imeslayen ara d-ibegnen ayen i s-iḥulfaɣ ass-a, imi txemmem ad iyi-terrem tajmilt. Cukkeɣ d ayen kan i ilaqen d wayen iwumi i zemreɣ i xedmeɣ. Tajmilt-a bɣiɣ ad tehduɣ i yilmeẓyen»
Aneggaru, d yiwen seg wid yeldin agezdu n tutlayt d yidles amaziɣ di tesdawit Akli Mohand Oulhadj iwumi tuɣal tejmilt. M’hemmed Djellaoui, imi d netta i yettwafernen, yenna : « Ur ẓriɣ ara ma ilaq ad iyi-tuɣal tejmilt ass-a zdat wid i aɣ-d-inejren abrid, d wid i yennuɣen almi tewweḍ tmaziɣt s anda akka i tella. »
D Youcef Merahi i irefden awal iwakken ad d-ibeggen tignatin ideg tɛedda rreḥba n udlis amaziɣ, anda yerra tajmilt i yimezdaɣ n Tubiret akked Lwali i d-ibegnen lebɣi-s iwakken rreḥba i d-iteddun ad tili d tin ara d-yesdukklen imazɣawalen n Lmerruk, Tunes d Libya. Dɣa da i d-yerra s uqbal i usuter n unemhal n yidles n Tubiret i yebɣan dakken rreḥba i d-iteddun ad tili deg wass n 19 maggu.
Ma d Ali Bouguerra, ibeggen-d deg wawal-is lebɣi-s s asnerni di ccan n tmaziɣt. Di lawan ideg i d-yewwi imeslayen-a i d-tɛedda Djouher Amhis iwakken ad as-tessels abernus, azamul n tuṣra d leɛnaya.
S. M