Gar waṭas n tiyid, taɣawsa i d-ijebden lwelha, send tifranin Tiselwayanin n Tmurt n Fransa n 2012, tid tewwi tama tazelmaḍt n François Hollande, d usebded n yiwet n tmeṭṭut, ɣef uqerru n tneɣlift n yirumiyen (Ifransawiyen) iberraniyen. Tameṭṭut-a, Isem-is Yamina Benguigui, tlul di Fransa, imawlan-is d izzayriyen n tmurt n Leqbayel. Yamina Benguigui ɣur-s 55 n yiseggasen di lɛemr-is, tettwassen ugar deg unnar n usaru (cinéma) ad d-nebder gar yisura-ines : «Mémoires d’immigrés» (1997), le long métrage de fiction «Inch’Allah dimanche» (2001), akken daɣ i d-tettwafren deg useggas 2008 akken ad tili d timwelleht n Paris, sin akkin tuɣal d timḍebbert tis snat n tɣiwant teṭṭef tama tazelmaḍt, ddaw n Bertrand Delanoê, teṭṭef timsal n yizerfan n umdan d umennuɣ mgal miḥyaf.
S wakka ihi i nezmer ad nessirem ahat, ad d-yass wass, ad teḥkem yiwet neɣ ad yeḥkem yiwen seg yizuran-is d azzayri neɣ xersum d aqbayli.
Samir Ait buεza