Lɣella n yirden, aseggas-a d tin yessefraḥen deg lwilaya n Tizi wezzu, imi tanemhalt n tfellaḥt tettraǧu azal n 132 000 iqenṭaren ɣef 5500 n yihigṭaren yettwazerɛen deg tamiwin yemxallafen n lwilaya. Aya, yekka-d seg ugeffur yewten deg ccetwa d tefsut.
Deg yiseggasen yezrin lɣella d tin yellan tessaweḍ ɣer 25 q/ ha, ma d aseggas-a tewweḍ almi d 35q ladɣa deg Draɛ Lmizan d Friḥa iwumi qqaren “ikuffan” n lwilaya anida i d- tettili tuẓut n 6% n wakal n tfellaḥt d irden. Si tama nniḍen tanemhalt n tefellaḥt d tin yessaramen ad tesnerni lɣella s wazal n 7.5% deg useggas n 2013. Ma deg tallit-a, d tamegra ad tebddu deg kra n wussan i d-iteddun, imi 16 n tmacinin n tmegra d 7 n yikumya i d-yettwaheggan. D acu kan, yiwet n teɣri i lemḥadra n rrezq-a seg tmes d tin i tger tnemhalt n tfellaḥt.
Dalila I.
Asefti deg uḥric n waman
Lwilaya n Tizi wezzu d tin i d- yesfaydin s yiwet n tdrimet n lqidar n 970 imelyun n yidinaren deg useggas-a n 2012 ilmend n usefti deg uḥric n waman deg tamiwin yemxallafen. Azal n 9 n tɣiwanin i d- yesfaydin s wahil-a gar-asent At Wagenun, At Yaḥia, At Umalu, At Buaddu, Aqbil, Iɛekkuren, At yaḥia Musa, At Tudert d Uzeffun. Am wakken daɣ ara d-yili uɛiwed n yiquads iqdimen.
Si tama nniḍen, ad nerr lwelha belli tiɣiwanin n ugafa n lwilaya yecban Tigzirt, Iflisen, Azeffun, Buǧimɛ, Aɣrib, Aqaru, At Cafaɛ, d Zekri ideg llant 214 n tudrin d tid ara yerǧun aggur n Ctember iwakken ad d-taweḍ nnuba-nsent s ucuddu ɣer ubaraj n Taqsebt, mi akken yetturaju waya ad d-yili deg waggur n Yulyu, aya s lecɣal i mazal ur kfin ara, wwḍen kan ɣer ɣer 85%.
Dalila I