D addal i izemren ad yessenqes kra kra ssus-a n lṭaba. Aya i d iswi n tazzla i d-iwejden ddurt-a iεeddan di Amizur s γur yiwwet n tdukkla n usmeḥses mgal aṭṭanen ASM, tin i wumi fkan asentel : « ass mebla lṭaba.». Aya yella-d ilmend n umulli i sfuggulen yal yal aseggas di yakk timura n umaḍal, i d-iγellin ass n 31 di maggu. Leqdic-a kkin deg-s azal n 150 n yimsazlen i d-yusan seg Amizur , Draε Qbila (Sṭif) Ḍiban d Ferεun . Ayen yelhan deg leqdic-a d akken akk lesnaf kkin , yal wa s terbaεt-is ; tella tin n yigurdan imecṭaḥ d tin n yergazen akk d terbaεt n tlawin. Win i d-yersen γef uqerruy n Tiddukla d amejjay d mass Meḥrez Mezhud i d-yefkan awal aneggaru imi tfuk tegnit-a. Ayen i d-yenna d akken « llan kra n yilmeẓyen sεan nniya ad ǧǧen lṭaba i d-yettawin aṭṭanen ur nḥellu, aya d ayen yessefraḥen, yewwi-d ad d-yili umeslay γef twaγit i ixeddem ladγa deg uḥric-a n yilmeẓyen ». Wid d-yeddan d tdukkla-ya ssawalen-d i wid akk yezdeγ waṭṭan n lṭaba ad xedmen addal akken ad beεden γef ssus-a, ara asen-id-yawin tamettant. Yerna lṭaba yettawi γer tissit d teḥcicin d wayen-nniγen . I usizdeg n temnaḍt-a , ama d tudrin ama d izenqan seg waṭṭanen n tmetti daγen tiddukla ASM n Amizur, inelmaden d yimejjayen ddukklen γef yiwen n uxeddim, imi fursen tagnit ad walin lixsas i yellan di tγiwanin i d-yettwabedren yakkan. Yerna gar tid i d-yesfaydin di leqdic-a d tin n Ferεun anida i d-yella umeslay γef yiwen n usentel i yerzan , aḥareb mgal tabaεuct taxabit i yettsamin lwalda n tmeṭṭut .Aya yegla-d s waṭas n wid yekkin yid-sen ladγa tilawin i d-yeẓran imejjayen ma yella kra n tbaεuct i d-ibanen deg-sent neγ ulac.
Soraya Rabia