D tajmilt ara k-yuɣalen ilmend n wass aɣelnaw n unaẓur ! D tajmilt ɣef udɣaɣ i d-terniḍ i lebni n ccna n teqbaylit s yiḍrisen izedyanen, d uẓawan ḥlawen.
Aḍebsi i d-yessufeɣ tikkelt-a s wazal-is, deg-s 11 n tezlatin yeffeɣ-d ɣer : Izem Productions. Ifures tagnit n rreḥba tis 8 n udlis d uqtelɣu amaziɣ i d-yellan di Tubiret iwakken ad yemmager imezdaɣ n temnaḍt-a iwumi i d-yewwi yiwet akken n terzeft. « Wicqa », d yiwet n tezlit i d-yefren Mohsa ad tt-yerr deg wudem n tjellabt n uḍebsi-s. Deg-s, i yessawal ɣer ṣṣwab d lxir, mi yenna :
Wicqa ma tehlekḍ-iyi
Ul-iw yewseɛ uxxam-is
Win ur necqi deg wiyaḍ niḍen
Yemdel tawwurt i wul-is
Ma yella tebɣiḍ-iyi
Ad iyi-d-tafeḍ d amɛiwin
Tezriḍ a gma ala Rebbi
Ur neḥwaǧ ula yiwen
Mohsa, mačči d win ixeddmen kan weḥd-s, imi ata-n ibder-it-id deg tezlit-a, iger tiɣri i yiwen n umedyaz S.Ait Mouhoub, Si Moh d Kadi Abdennour iwakken ad yessekles tizlatin-a. D yiwen n unaẓur yeḥsan belli ayen yelhan yettas-d s ccwer, am wakken dɣa i d-yenna Ccix Muḥend deg wawal-is : win yeččawaren d cci, win ur neččawar d ulaci. Mohsa ihi, seg wid yeggaren tiɣri i wid yesnen iwakken ad d-yagem seg tmusni-nsen, akken, mi ara d-yeffeɣ s annar, udem-is d acebḥan !
Tayri, d yiwen n usentel i yuɣen aẓar deg wayen ixeddem Mohsa, yessexdem kra n tenfaliyin yezzuzunen, i nezmer ad nsel di yal amkan di yal lawan. Si Moh, win akken i d-yegren afus-is deg usewjed n uḍebsi-a yewwi-d yiwen n uḍris anda yenna: ulayɣer keḥleɣ i tiṭ, ulayɣer taqendurt tajḍiḍt !
D asentel s wazal-is, anda i d-ibeggen dakken tayri tebna ɣef mačči ɣef yiselsa d uḥennek, meɛna d ayen ikeblen deg wul !
Isental, inbec akk akka d wakka Mohsa, yecna ɣef usirem, ɣef cfawat, tamurt d lexyal !
S. M